Расейскі рубель пакаціўся ўніз услед за абвалам нафты

Нафтавы рынак абрынуўся на фоне канфлікту КНР і ЗША.

Расейскі рубель аднавіў падзенне на Маскоўскай біржы ў чацвер на фоне рэзкага зніжэння коштаў нафты.

Пасля таго, як нафтавыя ф'ючэрсы абваліліся на 6% за дзень, да мінімальных з канца сакавіка адзнак курс даляра абнавіў тыднёвы максімум на адзнацы 64,9275 рубля, піша finanz.ru.

Умомант страціў 51 капейку да даляра і столькі ж да еўра, курс якога дасягнуў 72,33 рубля.

Сыравінныя рынкі, а з імі рубель завагаліся на фоне абвастрэння гандлёвага канфлікту паміж ЗША і Кітаем, канстатуе аналітык ІАЦ «Альпары» Ганна Бадрова.

У пачатку тыдня адміністрацыя Дональда Трампа абвясціла аб пастанове адрэзаць ад амерыканскіх тэхналогій і камплектуючых кітайскі кангламерат Huawei. У адказ Менкамерцыі КНР абвінаваціла ЗША ў «эканамічным ганенні» і выключыла аднаўленне перамоў, пакуль «памылкі не будуць выпраўленыя».

Для рубля, які трымаў пазіцыі за кошт прытоку замежнага капіталу ў расейскі дзяржаўны доўг, гэта «дрэнная навіна», кажа Бадрова.

«Тэфлонавы эфект» пачынае паступова пакідаць і рубель, і АФЗ», - канстатуе стратэг Danske Bank A/S у Хельсінкі Уладзімір Міклашэўскі.

На таргах у чацвер каціроўкі дзяржаўных папер пачалі падаць, прычым максімальнае зніжэнне было зафіксаванае ў доўгатэрміновых выпусках, якія трымаюць у асноўным нерэзідэнты.

15-гадовыя АФЗ 26225 аселі на 0,58%, а 8-гадовыя АФЗ 26207 - на 0,39%.

«Пункт кіпення становіцца ўсё бліжэй, і рынкі ўжо перасталі чакаць канца гандлёвай вайны да наступнага паўгоддзя», - кажа Міклашэўскі.

«Перарастанне гандлёвай вайны ў эканамічную можа абваліць фондавы рынак ЗША на дзясяткі адсоткаў. Тады інвестарам будзе наогул не да АФЗ. Пачнецца магутныя ўцёкі ад рызыкі і ўсе пабягуць з ЕМ», - папярэджвае генеральны дырэктар Sputnik AM Аляксандр Лосеў. Унутраныя крыніцы стабільнасці ў рубля адсутнічаюць: Мінфін і ЦБ скупляюць блізу 60% чыстага прытоку валюты па бягучым рахунку плацежнага балансу, а рэшта сыходзіць з краіны ў выглядзе адтоку капіталу, які, паводле звестак ЦБ, паскорыўся ўдвая і дасягнуў 34,7 млрд даляраў за студзень-красавік.

У такіх умовах прыток спекулятыўных інвестыцый у дзяржаўную запазычанасць - адзіная саломінка, за якую трымаецца курс, кажа эканаміст ING Дзмітрый Далгін.

У найбліжэйшыя месяцы сітуацыю для рубля ўскладніць перыяд выплаты дывідэндаў. Замежныя трымальнікі акцый, атрымаўшы выплаты ад кампаній, будуць канвертаваць іх у валюту - гэта стане дадатковым фактараў на карысць росту даляра і еўра, нагадвае кіруючы партнёр Exante Аляксей Кірыенка.