17 чэрвеня 2019, панядзелак, 12:59
Мы ў адной лодцы
Рубрыкі

У турэмным шпіталі на Валадарскага памёр хворы на дыябет

22

Мужчыну стала дрэнна, як толькі ў зале суда надзелі кайданкі.

У лютым гэтага года Андрэя Цярэшчанку асудзілі на паўтара года зняволення за кіраванне аўтамабілем у стане ап'янення.

Пра тое, што асуджаны памёр у турэмным шпіталі на Валадарскага, ягонай жонцы Алене паведамілі ўранку ў пятніцу, 24 траўня.

- Сказалі, што гэта здарылася ўчора ўвечары ад разрыву аорты, - паведаміла яна tut.by.

Нагадаем, Алена нядаўна распавяла гісторыю мужа ў СМІ. У лістападзе 2018 года на Андрэя Цярэшчанку склалі пратакол за знаходжанне за стырном у стане алкагольнага ап'янення. Жонка кажа, ездзіў у будаўнічую краму. Раней ён ужо прыцягваўся да адказнасці за такое парушэнне. На следстве ўсе прызнаў, і неўзабаве справу накіравалі ў суд. Прысуд - паўтара гады пазбаўлення волі, канфіскацыя аўтамабіля.

Мужчыну стала дрэнна, як толькі ў зале суда надзелі кайданкі, - праз цукровы дыябет. Спачатку Андрэя завезлі ў лякарню - «пракапаць», адтуль - у ізалятар. За тры месяцы пад вартай ягоны стан моцна пагоршыўся. «У яго былі дыябетычныя комы, адвакат казаў, ён з цяжкасцю мог дакументы падпісаць, - успамінае жонка. - Апошнім разам прыехала на спатканне, а ён у шпіталі».

У медыцынскіх дакументах, якія Алена паказала, паказаны дыягназ мужа - цукровы дыябет (інсуліназалежны), стадыя дэкампенсацыі, гіперглікемічны стан.

З адказу за подпісам намесніка начальніка ўправы тылавога забеспячэння ДВП Генадзя Самончыка вынікала, што падчас адбыцця пакарання Андрэй Цярэшчанка неаднаразова знаходзіўся на лячэнні і абследаванні, у тым ліку ў стацыянары медчасткі турмы №8 у Жодзіне.

Абаронца прасіў змяніць пакаранне, улічыць праблемы са здароўем абвінавачанага. Санкцыя ч.2 арт.317/1 КК (Кіраванне аўтамабілем у стане алкагольнага ап'янення асобай, якая раней ужо ўчыняла такое парушэнне) прадугледжвае і больш мяккае пакаранне - арышт, абмежаванне волі. Абвінавачаны і ягоная сям'я разлічвалі на паблажку. Але вышэйшы суд пакінуў прысуд у дзеянні.

Апошні тыдзень Андрэй Цярэшчанка знаходзіўся ў рэспубліканскім турэмным шпіталі, куды яго тэрмінова перавялі з Жодзіна.