Відэафакт: У Чыкага нарадзіўся вельмі рэдкі чорны насарог

Нараджэнне рэдкага малога ў заапарку робіць унёсак у аднаўленне віду.

У размешчаным у Чыкага заапарку Lincoln Park Zoo здарылася радасная падзея 20 траўня ў 13-гадовай самкі чорнага насарога (лац. Diceros bicornis) па мянушцы Капукі (Kapuki) нарадзілася малеча, паведамляе National Geographic.

Назва «чорны» - умоўная і выпадковая; да колеру скуры жывёлы яна дачынення не мае. У рэчаіснасці чорныя, як і белыя насарогі, афарбаваныя ў залежнасці ад колеру грунту, на якім яны жывуць. У сярэдзіне XIX стагоддзя чорны насарог быў шырока распаўсюджаны ў афрыканскіх саванах. У 1970 годзе ў Афрыцы налічвалася блізу 65 000 асобін, але цяпер, паводле звестак за 2016 год, на планеце засталося не больш за 5500 чорных насарогаў. Найбольш моцнае скарачэнне папуляцыі праз браканьерства і адсутнасць мер барацьбы з гэтай з'явай адбылося ў перыяд 1970-1992 гады: тады загінула 96% унікальных афрыканскіх жывёл.

Нараджэнне рэдкага малога ў заапарку робіць унёсак у аднаўленне віду, што знікае. Бацькам нованароджанага з'яўляецца самец па мянушцы Маку (Maku). Гэта даўні партнёр Капукі. Пара была падабраная на аснове генетычнага і іншых аналізаў, якія спецыялісты праводзяць для жывёл, чые віды аказаліся на мяжы знікнення, і рэкамендацыі апынуліся добрымі: у 2013 годзе Маку і Капукі ўжо нарадзілі свайго першынца, які атрымаў мянушку Кароль (King).

У заапарку да цяжарнасці чорных насарогаў падыходзяць з вялікай адказнасцю. Як толькі ветэрынары ўсталявалі гэты факт, рацыён Капукі быў папоўнены яе ўлюбёнай ежай - яблыкамі і сенам, каб будучая маці атрымала максімум вітамінаў. Цяжарнасць у гэтых жывёл доўжыцца 15 месяцаў, і ўвесь гэты час Капукі была акружаная ўвагай і падтрымкай.

Першыя 48 гадзін з моманту нараджэння - самыя крытычныя для чорных насарогаў, але новая малеча паспяхова перажыла іх. Яго пол дагэтуль не вядомы: ветэрынары не трывожаць маці і дзіцяня, кантралюючы сітуацыю пры дапамозе вэб-камеры.