Упершыню ў гісторыі беларуску абралі ў склад выканкама ФІБА-Еўропа

Усяго на месцы прэтэндавалі 38 кандыдатаў.

На генеральнай асамблеі Міжнароднай федэрацыі баскетбола (FIBA) у Еўропе ў Мюнхене адбыліся выбары кіроўных органаў арганізацыі, паведамляе афіцыйны сайт БФБ.

Генеральная сакратарка і выканаўчая дырэктарка Беларускай федэрацыі баскетбола Настасся Марыніна выбраная ў склад выканкама ФІБА Еўропа. Усяго на 23 месцы прэтэндавалі 38 кандыдатаў, Марыніна набрала 10-ю колькасць галасоў - 36.

Упершыню ў гісторыі айчыннага баскетбола Беларусь будзе прадстаўленая ў выканаўчых органах міжнароднай арганізацыі.

У асамблеі бралі ўдзел кіраўнікі 50 нацыянальных федэрацый кантынента, прэзідэнт ФІБА Арас Мураторэ, генеральны сакратар ФІБА Андрэас Загкліс, а таксама ганаровыя госці. Нашу краіну прадстаўляла дэлегацыя на чале са старшынём федэрацыі Максімам Рыжанковым.

Падчас выбараў прэзідэнтам ФІБА Еўропа пераабраны Тургай Дземірэль (Турцыя), скарбнікам - Карл Талер (Аўстрыя). У склад выканкама ўвайшлі 23 прадстаўнікі нацыянальных федэрацый.