Кожны дзясяты буйны банк у Расеі прызналі «зомбі»
5- 27.05.2019, 16:25
- 9,337
Індэкс здароўя расейскай банкаўскай сістэмы зніжаецца праз інфляцыю і назапашаны груз «дрэнных» актываў.
На старце банкруцтва знаходзіцца кожная дзясятая крэдытная арганізацыя РФ, якая мае ліцэнзію ЦБ. Да такой высновы прыйшлі аналітыкі рэйтынгавага агенцтва «Эксперт РА» ў чарговым аглядзе банкаўскага сектара, піша finanz.ru.
На 1 красавіка кожны чацвёрты расейскі банк не генераваў прыбытак, 162 банкі зазналі значны адток (больш за 15%) сродкаў карпаратыўных кліентаў. 136 банкаў губляюць грошы фізічных асоб.
У кандыдатах «на вылет» з рынку ў найбліжэйшыя 12 месяцаў уважаюцца 46 банкаў з 430, падлічылі ў агенцтве. Іх бізнэс-мадэль з'яўляецца «нежыццяздольнай» - яна не забяспечвае генерацыю капіталу, якая магла б кампенсаваць страты ад рэалізацыі ўсіх рызык.
«Значная частка такіх банкаў залежная ад уліванняў у капітал з боку ўласнікаў, цікавасць якіх да падтрымкі свайго банкаўскага бізнэсу можа слабець на фоне яго нізкай акупнасці», - канстатуе «Эксперт РА».
Новая хваля адклікання ліцэнзій закране ў тым ліку і адносна буйныя і сярэднія банкі: з топ-100 спыняць сваю дзейнасць 10 крэдытных арганізацый, сказаў РБК кіраўнік дырэктар у валідацыі «Эксперт РА» Юры Белікаў.
Сістэмна значныя банкі з топ-20 «венік ЦБ» пашкадуе: нават у крытычнай сітуацыі, накшталт той, у якой выявіліся «Адкрыццё», Бінбанк і Прамсувязьбанк, дзяржаве танней надрукаваць некалькі трыльёнаў рублёў для іх выратавання, чым расплачвацца з уладальнікамі ўкладаў і пажынаць плён ланцуговай рэакцыі дэфолтаў на міжбанкаўскім рынку.
З 2013 года, калі стартавала расчыстка банкаўскага сектара, ЦБ уліў у банкаўскую сістэму 80 млрд даляраў, або 5,2 трыльёна рублёў, ацэньвала раней міжнароднае рэйтынгавае агенцтва Fitch.
Амаль 30 млрд даляраў, або блізу 2 трыльёнаў рублёў, давялося выдаткаваць на выплаты кампенсацыі праз Агенцтва страхавання ўкладаў, фінансаванне якога амаль цалкам легла на «друкаваны станок» ЦБ.
Яшчэ блізу 20 млрд даляраў ЦБ выдаў банкам у якасці крэдытаў на санацыю і дакапіталізацыю іншых праблемных банкаў. Частка гэтых грошай «згарэла» без следу.
Яшчэ 30 млрд даляраў давялося выдаткаваць на санацыю праз Фонд кансалідацыі банкаўскага сектара.