Наступствы непагадзі: паваленыя дрэвы, сарваныя дахі і дамы, якія загарэліся

За пару гадзін у Берасцейскай вобласці выпала столькі ападкаў, колькі звычайна выліваецца за два тыдні.

Як і абяцалі сіноптыкі, вечарам 29 траўня ў Беларусі прайшлі моцныя ліўні з парывістым ветрам. Наступствы непагадзі выявіліся адчувальнымі і для прыроды, і для людзей, піша kp.by.

Вецер зрываў дахі з дамоў і цэркваў

У МНС распавялі, што ў Менску вецер сарваў частку канструкцыі прыватнага дома ля Запарожскай плошчы. Абломкі адляцелі даволі далёка ад самага дома, іх выкінула ветрам на праезную частку, яны знеслі святлафор, закранулі і пашкодзілі тры аўтамабілі. На шчасце, пацярпелых не было.

У гэты ж час парывісты вецер пашкодзіў дах будынка царквы «Гефсіманія» на вуліцы Баграціёна. Ратавальнікі таксама зафіксавалі выпадкі падзення дрэў праз вецер, шэсць у Менску і пяць у Віцебскай вобласці. Дрэвы пашкодзілі 7 аўтамабіляў.

Даставіў клопатаў і дождж.

- У Менску з 17.30 да 18.30 выпала 20 мм ападкаў пры сярэднямесячнай норме 65 мм. У выніку былі падтопленыя 5 адрэзкаў дарог, адбылася прыпыненне руху (да 56 хвілін) 19 тралейбусных маршрутаў, - удакладняюць ў прэс-службе МНС.

Сапраўдным НЗ стаў лівень у Валожынскім раёне Менскай вобласці. Там моцны дождж змыў адцінак дарогі на трасе Р-54 паміж вёскамі Пяршаі і Скрундзеўшчынай. У сярэдзіне дарогі ўтварыўся «каньён» шырынёй, не меншай за тры метры, з абрывістымі берагамі і ракой унізе. Таксама пструмень вады змыў адрэзак дарогі ў самой вёсцы Пяршаях.

- У выніку дажджу адбыліся падмывы грунту і разбурэнні адрэзкаў асфальтавай дарогі. Пацярпелых няма. Жыццезабеспячэнне насельніцтва не парушанае. Вядуцца рамонтна-аднаўленчыя работы, - паведамляе МНС.

Але не толькі дождж і вецер сталі прычынай здарэнняў: у вёсцы Міхнавічах Калінкавіцкага раёна загарэліся два дамы. У адным пажар знішчыў шыферны дах, пашкодзіў сцены. У другім пашкоджаны франтон - частка даху з фасада. Як паведамляюць у МНС Гомельскай вобласці, у абодвух выпадках галоўная версія прычыны пажараў - «праява сіл прыроды», гэта значыць, маланка.

Сіноптыкі: «Ападкаў было шмат, але гэта далёка не рэкорд»

Сіноптыкі гавораць, што ў такіх з'явах надвор'я ў траўні няма нічога дзіўнага.

- Норма ападкаў для траўня ў краіне - ад 54 да 65 мм. Учора самая вялікая колькасць ападкаў было зафіксаваная ў Берасцейскай вобласці, на метэастанцыі «Палеская» - 31 мм. Гэта значыць, толькі блізу паловы нормы выпала. У Менску норма - 65 мм. У раёне Усходу выпала 26 мм ападкаў, ва Уруччы - і зусім 14 мм, гэта значыць, каля трэцяй часткі нормы. Гэта, вядома, шмат, але гэта не рэкорд. Бывае, што за дзень выпадае месячная або паўтарамесячная норма ападкаў, - тлумачыць начальнік службы метэаралагічных прагнозаў Белгідрамета Мінпрыроды Аляксандр Бяганскі. - Аднак гэта самыя багатыя ападкі за ўвесь месяц. Была вельмі сур'ёзная інтэнсіўнасць, дождж ішоў бесперапынна дзве-тры гадзіны. Гэта сведчыць пра тое, наколькі актыўны атмасферны фронт праходзіў праз цэнтральныя раёны краіны. Таксама ўчора ўзмацняўся вецер парывамі ад 13 да 16 м/с, гэта звесткі пунктаў назірання, у асобных раёнах вецер мог быць мацнейшым.

- Ці варта турбавацца, што каляндарнае лета таксама пачнецца з непагадзі?

- Найбліжэйшым часам можна перадыхнуць, чакаецца спакойнае надвор'е. У пятніцу, 31 траўня, і суботу, 1 чэрвеня, надвор'е будзе фармаваць вобласць павышанага атмасфернага ціску, ападкаў практычна не чакаецца. У пятніцу ёсць імавернасць ападкаў на паўднёвым усходзе краіны, у Гомельскай і Магілёўскай абласцях, а ў суботу - на паўночным захадзе. Але гэта будуць кароткачасовыя дажджы. У той жа час будзе вельмі цёпла, напрыклад, у нядзелю, 2 чэрвеня, - ад 20 да 27 градусаў цяпла!

Са слоў сіноптыкаў, пачатак наступнага тыдня будзе таксама прыемным: мала ападкаў і летнія тэмпературы. Дажджы магчымыя толькі ў сярэдзіне тыдня.