У Кітаі стварылі камеру, якая фатаграфуе на адлегласці 45 кіламетраў

Фізікі з Шанхая распрацавалі спецыяльны дэтэктар фатонаў.

Каманда распрацоўнікаў заяўляе, што іх тэхналогію можна выкарыстоўваць для сачэння ў авіяцыі, дыстанцыйнага зандавання і вызначэння аддаленых цэляў.

Фізікі з Навукова-тэхнічнага ўніверсітэта Кітая распрацавалі камеру, якая дазваляе сфатаграфаваць аб'ект на адлегласці 45 км, піша MIT Technology Review (пераклад – korrespondent.net).

Паколькі бруднае паветра ў гарадах не дазваляе зафіксаваць дастатковую колькасць святла нават на адлегласці некалькі кіламетраў, фатаграфіі больш аддаленых аб'ектаў былі практычна немагчымымі.

Фізікі з Шанхая распрацавалі спецыяльны дэтэктар фатонаў – драбнюткіх часціцаў святла – і алгарытм, які можа збіраць іх у адно з розных кропак, і ствараць карцінку ў высокай разрознасці ў трохмернай прасторы.

Асновай тэхналогіі з'яўляецца інфрачырвоны лазер, які адлюстроўваецца ад аб'ектаў і стварае іх малюнак. Адлюстраванаму святлу патрэбная пэўная колькасць часу, каб вярнуцца назад да дэтэктара, у залежнасці ад дыстанцыі. Гэта дазваляе ігнараваць часціцы святла, якія не трапляюць у гэты часавы прамежак і пазбегнуць розных светлавых шумоў у фатаграфіі нават на такой дыстанцыі.

Навукоўцы выкарысталі лазер з частатой 100 кГц і 280-мм астранамічны тэлескоп з дэтэктарам адлюстраваных фатонаў і рухомым люстэркам. Гэтае абсталяванне стварала двухмерны малюнак, а лічбавы алгарытм збіраў атрыманыя звесткі разам і фармаваў 3D-карцінку.

"Наша сістэма прыдатная для стварэння карцінак на адлегласці некалькіх сотняў кіламетраў з улікам паляпшэння налады. Гэта ўяўляе сабой значную вяху на шляху да хуткай LiDAR-сістэмы з нізкім энэргаспажываннем і высокай разрознасцю на вельмі вялікіх адлегласцях", – кажуць навукоўцы з Навукова-тэхнічнага ўніверсітэта ў Шанхаі.

Каманда распрацоўнікаў заяўляе, што іх тэхналогію можна выкарыстоўваць для сачэння ў авіяцыі, дыстанцыйнага зандавання і вызначэння аддаленых цэляў.