У Менску затрымалі інгушскага блогера і журналіста Ісмаіла Нальгіева
- 8.05.2019, 15:47
- 11,196
Яго могуць выдаць Расеі.
Старшыня інгушскага рэгіянальнага аддзялення партыі «Яблык» Руслан Муцольгаў паведаміў baj.by пра тое, што інгушскі апазіцыйны блогер і журналіст Ісмаіл Нальгіеў затрыманы ў менскім аэрапорце пры выездзе з краіны. Сваякі асцерагаюцца, што Нальгіеў будзе перададзены расейскім уладам.
Са слоў палітыка, Ісмаіл Нальгіеў - блогер і журналіст, адзін з лідараў пратэстаў у Інгушэціі, які часта сутыкаецца з пераследам паводле палітычных матываў. Ісмаіл павінен быў вылецець з Менска ў Еўропу 8 траўня але быў затрыманы на памежным кантролі ў сувязі з тым, што ён нібыта знаходзіцца ў расейскім спісе асоб, якiя адшукваюцца.
Інфармацыю пра гэта Беларускай асацыяцыі журналістаў пацвердзілі ў памежным камітэце Беларусі.
Цяпер Ісмаіл Нальгіеў знаходзіцца ў Аддзеле ўнутраных спраў у Нацыянальным аэрапорце, праваахоўнікі вызначаюць ягоны далейшы лёс.
Дзяжурны па АУС запэўніў журналістаў у тым, што «без належнага працэсуальнага афармлення Нальгіеў выдадзены Расеі не будзе».
Да затрыманага з Менска выехаў адвакат.