Даследаванне: Хуткасць хады ўплывае на працягласць жыцця

Якім жа павінен быць тэмп хады?

"Новае даследаванне, праведзенае камандай навукоўцаў з Цэнтра медычна-біялагічных даследаванняў Лестэра, выявіла ўзаемасувязь паміж працягласцю жыцця і сярэдняй хуткасцю хады", - паведамляе нямецкі часопіс Focus (пераклад - inopressa.ru).

"Вынікі праведзенага даследавання грунтуюцца на звестак амаль паўмільёна жыхароў Вялікабрытаніі, - піша выданне. - Удзельнікі даследавання цягам прыкладна 7 гадоў падавалі інфармацыю аб сваім звыклым тэмпе хады, ацэньваючы яго як павольны, сярэдні ці хуткі. Навукоўцы падлічылі колькасць памерлых за гэты перыяд удзельнікаў і на аснове статыстычных падлікаў змаглі выявіць узаемасувязь паміж тэмпам хады і працягласцю жыцця".

"Высновы, апублікаваныя ў медыцынскім часопісе Mayo Clinic Proceedings, сведчаць: тыя, хто ходзіць хутка, жывуць даўжэй тых, хто ходзіць павольна".

"Пры гэтым сама па сабе хуткая хада не можа магічным чынам дадаць некалькі гадоў жыцця. Больш доўгае жыццё абяцае хутчэй здольнасць хутка перасоўвацца, звязаная з больш высокім узроўнем фізічнай падрыхтоўкі", - адзначае выданне.

"Даследаванне таксама паказала, што больш высокая хуткасць хады можа сведчыць аб большай працягласці жыцця незалежна ад вагі чалавека: працягласць жыцця аматараў хуткай хады з падвышаным індэксам масы цела (ІМТ) была амаль такая ж, як і ў скараходаў са звычайнай ІМТ".

"Даследаванне паказала, што фізічная форма з'яўляецца больш надзейным індыкатарам працягласці жыцця, чым ІМТ", - кажа прафесар Том Ейтс, прафесар Лестэрскага ўніверсітэта і адзін з галоўных аўтараў даследавання.

Якім жа павінен быць тэмп хады? "Даследнікі Масачусэцкага ўніверсітэта распачалі некалькі спроб для высвятлення аптымальнага тэмпу хады, і прыйшлі да выніку, якога можа дасягнуць кожны: 100 крокаў за хвіліну", - паказвае выданне.

"Даследаванне з удзелам паджылых людзей яшчэ ў 2011 годзе паказала, што чым хутчэй хадзілі ўдзельнікі даследавання, тым лепш былі вынікі іх тэстаў на стан здароўя. Даследнікі з Універсітэта Паўднёвай Каліфорніі, у сваю чаргу, высветлілі, што павольная хуткасць хады можа быць для лекараў прыкметай наяўнасці ў пацыента праблем са здароўем, напрыклад, захворванняў сэрцава-судзіннай сістэмы і кагнітыўных разладаў. Кардыяхірургі нават прапанавалі выкарыстоўваць звесткі аб хуткасці хады для выяўлення пацыентаў, якія з цяжкасцю аднаўляюцца пасля аперацый на сэрцы", - піша Focus.