17 чэрвеня 2019, панядзелак, 1:00
Мы ў адной лодцы
Рубрыкі

Новы кіраўнік МЗС Малдовы назваў «чырвоную лінію» ў дачыненнях з РФ

6
НІКУ ПАПЕСКУ

МЗС краіны катэгарычна адмаўляе «федэралізацыю», пра якую казаў алігарх Плахатнюк.

Міністр замежных спраў і еўраінтэграцыі Малдовы Ніку Папеску паведаміў, што Кішынёў хоча падтрымліваць добрыя стасункі з Расеяй, але не будзе для гэтага пераходзіць «чырвоныя лініі» і пагаджацца на федэралізацыю Малдовы.

Пра гэта паведамляе «Европейская правда» са спасылкай на Deschide.

«Малдаване не канфліктныя людзі і не хочуць быць з кім-небудзь у дрэнных дачыненнях. Мая стартавая пазіцыя ў замежнай палітыцы - гэта добрыя стасункі з усімі, у тым ліку з Расеяй, аднак ёсць чырвоныя лініі, якія мы не пяройдзем. Падчас прысягі я сказаў, што буду абараняць цэласнасць Рэспублікі Малдова. Мы не можам ажыццявіць федэралізацыю Малдовы, я пакляўся абараняць незалежнасць. Мы хочам прагматычнага партнёрства з Расеяй, а перамовы аб федэралізацыі не тычацца гэтага партнёрства. Мы будзем падтрымліваць пазітыўны дыялог з Расеяй і пераадолеем разыходжанні», - сказаў Папеску.

З ягоных слоў, Расея, ЕЗ і ЗША прыйшлі да кансенсусу аб Малдове: «Гэтыя сілы хочуць, каб Малдова была стабільнай дзяржавай, таму пераадолелі існыя рознагалоссі, усе яны сказалі, што хочуць мірнай перадачы ўлады».

Як паведамляе Ziarul Naţional, Папеску дадаў, што ўжо пагаварыў з дарадцам старшыні ЕЗ і супрацоўнічае з некалькімі заходнімі канцылярыямі. Ён дадаў, што «падтрымка Румыніі, краіны, з якой мы шмат у чым дзелім адну гісторыю, мову і ідэнтычнасць, вельмі важная».

Ён дадаў, што хоча эфектыўна супрацоўнічаць з малдаўскімі пасламі, акрэдытаванымі ў розных краінах, каб вярнуць Малдову ў «станоўчае поле» ЕЗ.

«Тыя, хто добра працуе, застануцца на сваіх пасадах. Магу сказаць, што 99,9% супрацоўнікаў МЗС застануцца на пасадзе. Яны самі прымуць пастанову, калі хочуць працаваць са мной», - сказаў ён.

На днях віцэ-прэм'ер РФ Дзмітрый Козак, які з'яўляецца спецпрадстаўніком прэзідэнта Пуціна ў пытаннях супрацоўніцтва з Малдовай, заявіў, што малдаўскі алігарх, лідар Дэмакратычнай партыі Улад Плахатнюк прапанаваў прарасейскай Партыі сацыялістаў стварыць агульную кааліцыю і, дарэчы, урэгуляваць прыднястроўскі канфлікт шляхам федэралізацыі Малдовы.

Са слоў Плахатнюка, менавіта Расея, прынамсі, Козак, прапаноўваў яму развязаць прыднястроўскі канфлікт праз федэралізацыю рэспублікі.