На вучэннях пад Слонімам лейтэнанты пратрымалі жаўнера ў яме ў зямлі амаль тры дні
50- 13.06.2019, 11:16
- 56,172
За тое, што «зэканоміў» 27 патронаў да аўтамата Калашнікава.
Падчас вучэнняў на палігоне пад Слонімам два старшыя лейтэнанты здзекаваліся з жаўнера тэрміновай службы і нават пасадзілі яго ў зіндан - спехам выкапаная яма ў зямлі, дзе і пратрымалі ў холадзе з 26 да 28 красавіка мінулага 2018 года, піша «Віцебскі кур'ер» са спасылкай на тэлеграм-канал NEXTA.
У час вучэнняў жаўнер «зэканоміў» 27 патронаў да аўтамата Калашнікава, каб потым пастраляць у адзіноце. Старэйшыя лейтэнанты 3-цяй мотастралковай роты в/ч 14398 з паселішча Заслонава Лепельскага раёна расцанілі гэта як крадзеж боепрыпасаў і адправілі шарагоўца тэрміновай службы ў халодную яму, дзе два дні з яго здзекаваліся.
Следства ішло амаль год. А суд Лепельскага раёна, які разглядаў крымінальную справу ў дачыненні да двух афіцэраў на падставе часткі 2 артыкула 455 КК Беларусі («Злоўжыванне ўладай, перавышэнне ўлады альбо бяздзейнасць улады»), 22 траўня 2019 года прысудзіў лейтэнантаў да абмежавання ў вайсковай службе тэрмінам на 2 гады з утрыманнем 25 % грашовага забеспячэння ў даход дзяржавы і без пазбаўлення права займаць камандзірскія пасады.
У пракуратуры вынеслі касацыйны пратэст. 28 траўня 2019 года справу перагледзела судовая калегія крымінальных спраў Віцебскага абласнога суда, якая змяніла прысуд. Станіславу Варанкову прызначылі 4 гады, а Андрэю Мацяленку - 3 гады і 6 месяцаў калоніі ўзмоцненага рэжыму. Абодвум - з пазбаўленнем права займаць пасады, звязаныя з выкананнем арганізацыйна-распарадчых мерапрыемстваў тэрмінам на 5 гадоў і з пазбаўленнем вайсковы рангаў «старшы лейтэнант».
Пастанова калегіі ў крымінальных справах Віцебскага абласнога суда была абскарджаная. Пры гэтым аргументацыя афіцэраў даволі цікавая.
- Прашу зразумець мяне правільна: калі б не было скрадзеных патронаў, то не было б і злачынства з нашага боку, - напісаў у сваёй касацыйнай скарзе, са звестак NEXTA, адзін са старшых лейтэнантаў. - У гэтай сітуацыі трэба было жаўнера ізаляваць, а ніякіх іншых памяшканняў на палігоне няма. Мы і самі ўвесь час жывем у час актыўных фаз вучэнняў у акопах, у зямлянках, буданах, якія, як ні круці, з'яўляюцца звычайнай ямай як у лесе, так у поле і балоце, пад адкрытым небам, і ніхто ж не задаецца пытаннем, што можа быць гэта таксама «асаблівая жорсткасць» і «здзек» у дачыненні да вайскоўцаў усіх катэгорый і рангаў. Нават сам набор на тэрміновую вайсковую службу можна расцэньваць як факт нейкага псіхалагічнага гвалту і стварэння ўмоў асаблівай жорсткасці і здзеку з навабранца: нежаданне многіх ісці ў войска - гэта агульнавядомы факт, бо паўтара года ніхто не хоча марнаваць, гэты час многія б правялі ў мэтах заробку грошай і іншых асабістых інтарэсаў, а абмежаванне яго свабод і права, гвалтоўнае адлучэнне ад родных і блізкіх з'яўляецца прымусам да занятку тым, чым яму абсалютна не хочацца займацца.
Кропку ў крымінальнай справе пра жаўнера, двух старшых лейтэнантаў і халодны зіндан цяпер давядзецца ставіць Вярхоўнаму суду Беларусі.