Берасцейцы дамагліся прыпынення будаўніцтва завода АКБ

«Губернатар» Ліс спыніў будаўніцтва да «ліквідацыі выяўленых парушэнняў».

Старшыня Берасцейскага аблвыканкама Анатоль Ліс падпісаў распараджэнне аб прыпыненні будаўніцтва акумулятарнага завода, паведамляе сайт аблвыканкама.

На падставе падпункта 2.6 пункта 2 артыкула 48 Закона Рэспублікі Беларусь ад 4 студзеня 2010 года № 108-З «Аб мясцовым кіраванні і самакіраванні ў Рэспубліцы Беларусь», інфармацыі Міністэрства прыродных рэсурсаў і аховы навакольнага асяроддзя Рэспублікі Беларусь (ліст ад 13 чэрвеня 2019 года №11-1-6/2642), «губернатар» пастанавіў прыпыніць будаўніцтва аб'екта «Акумулятарны завод ТАА «АйПауэр» з уласнай кацельні на прыродным газе на адрасе: Берасцейскі раён СЭЗ «Брэст» раён «Аэрапорта» 1 пускавы комплекс» да выпраўлення выяўленых парушэнняў.

Акумулятарны завод знаходзіцца на прамысловай пляцоўцы «Аэрапорт» у свабоднай эканамічнай зоне «Брэст» ТАА «АйПауэр». Жыхары Берасця і некалькіх вёсак Берасцейскага раёна мяркуюць, што прадпрыемства пагражае іх здароўю. З 25 лютага 2018 года кожную нядзелю на плошчу Леніна ў Берасці прыходзяць супраціўнікі будаўніцтва акумулятарнага завода, якія размаўляюць і абменьваюцца апошнімі навінамі аб будаўніцтве прадпрыемства.

Нагадаем, берасцейцы больш за год выходзяць на цэнтральную плошчу Берасця і «кормяць галубоў» на знак пратэсту супраць будаўніцтва АКБ.

Акцыі ў Берасці сталі самымі працяглымі у гісторыі незалежнай Беларусі.