Ігар Шытаў: Думаю, мы змаглі б даціснуць Паўночную Ірландыю

Абаронца футбольнай нацыянальнай каманды Беларусі пракаментаваў гульню кваліфікацыі ЧЕ-2020.

Абаронца нацыянальнай каманды Беларусі Ігар Шытаў у інтэрв'ю Крысціне Козел адзначыў малую колькасць заўзятараў на гульні з Паўночнай Ірландыяй, паведамляе «Трибуна».

- Наколькі рэальна было зачапіць немцаў?

- Мы адпрацавалі на 200 адсоткаў. Можа быць, нам спрыяла ўдача. Калі б заляцеў мяч, калі біў Драгун або Навумаў, можа і маглі б зачапіць. Клас іх брамніка, клас гульцоў... Наш клас рэальна ніжэйшы. Мы маглі спадзявацца на ўдачу.

- Матч супраць Паўночнай Ірландыі быў роўным.

- Зноў жа ўдача. Думаю, мы змаглі б іх даціснуць, калі б падтрымка трыбун была лепшай. Не было атмасферы матчу нацыянальнай каманды. Мы былі расчараваныя, што так мала людзей было на гульні. Іх заўзятары перакрыквалі наш стадыён, арганічна глядзеліся, прыехалі за гадзіну да матчу і падтрымлівалі сваю каманду. Гэта немалаважны фактар. У матчы супраць Нямеччыны адсоткаў 30 заўзятараў спявалі гімн, гэта рэальна зараджае энэргіяй. Атрымліваецца такое духоўнае аб'яднанне, было выдатна. Калі б увесь стадыён спяваў, думаю, на эмацыйным зарадзе першыя 20 хвілін мы маглі б неяк паказаць узровень.

- Мы ведаем, якая рэакцыя натоўпу будзе на гэтыя словы: «Яны гуляць не ўмеюць, а ім раптам падтрымкі не выстарчыла».

- Я не адмаўляюся ад ідэі, што мы павінны заслужыць падтрымку і любоў заўзятараў. Я бачу, што хлопцы выходзяць з агнём у вачах, - сказаў Шытаў.