Трамп абвінаваціў Іран у падрыве танкераў у Аманскім заліве

У якасці доказу прэзідэнт ЗША звярнуў увагу на відэазапіс.

Прэзідэнт ЗША Дональд Трамп абвінаваціў Іран у меркаваным падрыве двух танкераў у Аманскім заліве. «Іран сапраўды зрабіў гэта. Яны зрабілі гэта, таму што вы бачылі катар. Я думаю, што адна з мін не разарвалася, і на ёй хіба што не напісана было, што яна іранская. Вы бачылі катар, які паспяхова спрабуе зняць міну са сценкі борта танкера, гэта было зафіксавана, яны былі ў гэтым выкрытыя», - сказаў Трамп у інтэрв'ю амерыканскаму тэлеканалу Fox News у пятніцу, 14 чэрвеня, паведамляе dw.com.

Выстаўляючы абвінавачванні супраць Ірана, прэзідэнт ЗША спаслаўся на відэазапіс, апублікаваны амерыканскім вайсковым камандаваннем Centcom. На ім відаць, як да аднаго з танкераў падыходзіць катар і нейкія людзі выдаляюць з танкера нейкі прадмет, як мяркуецца, міну.

Трамп не ўдакладніў, якія меры ён мае намер прыняць, сказаўшы толькі, што жорсткія амерыканскія санкцыі супраць нафтавай прамысловасці Ірана далі б жаданы вынік.

Іран зняпраўджвае абвінавачванні

Кіраўнік МЗС Ірана Джавад Зарыф катэгарычна адхіліў дачыненне сваёй краіны да меркаванага падрыву танкераў у Аманскім заліве, абвінаваціўшы ЗША ў тым, што яны робяць высновы пры поўнай адсутнасці фактычных або ўскосных довадаў. У сваім мікраблогу ў Twitter Зарыф таксама абвінаваціў ЗША ў спробе «сабатаваць дыпламатычныя намаганні», што прымаюцца прэм'ер-міністрам Японіі Сіндза Абэ, і «замаскіраваць свой эканамічны тэрарызм супраць Ірана».

Генеральны сакратар ААН Антоніу Гутэрыш заклікаў да незалежнага расследавання інцыдэнту ў Аманскім заліве. «Вельмі важна высветліць праўду. Цалкам відавочна, што гэта можна зрабіць толькі пры наяўнасці незалежнай камісіі, якая праверыць усе факты», - сказаў ён у Нью-Ёрку.

Між тым кіраўнік МЗС Вялікабрытаніі Джэрэмі Хант заявіў, што яго краіна «амаль упэўненая» ў тым, што ў меркаваным падрыве танкераў вінаваты Іран.