У Еўразвязе асудзілі смяротныя пакаранні ў Беларусі

Прадстаўніца Еўрапейскай службы замежных сувязяў заклікала Беларусь скасаваць смяротнае пакаранне.

Еўрапейскі Звяз асуджае смяротныя пакаранні двух чалавек у Беларусі. Пра гэта гаворыцца ў заяве прадстаўніцы Еўрапейскай службы замежных сувязяў Маі Касьянчыч, апублікаванай на сайце службы 14 чэрвеня.

Яна заявіла, што ў чэрвені быў пакараны асуджаны Аляксандр Жыльнікаў, а таксама, магчыма, смяротны прысуд прывялі ў дзеянне ў дачыненні да Вячаслава Сухаркі. Касьянчыч выказала спачуванне іх сем'ям.

«У той жа час ЕЗ пацвярджае сваю рашучую непрымальнасць смяротнага пакарання пры ўсякіх абставінах і заклікае Беларусь увесці мараторый на смяротнае пакаранне ў якасці першага кроку да скасавання. Смяротнае пакаранне парушае неад'емнае права на жыццё, замацаванае ва Усеагульнай дэкларацыі правоў чалавека, і з’яўляецца крайне жорсткім, бесчалавечным і зневажальным пакараннем. Прадаўжэнне выкарыстання смяротнага пакарання супярэчыць міжнародным абавязкам Беларусі», - заявіла спікер.

Касьянчыч падкрэсліла, што Беларусь - адзіная краіна ў Еўропе, якая ўсё яшчэ ўжывае смяротнае пакаранне.

Праваабарончы цэнтр «Вясна» 13 чэрвеня паведаміў пра пакаранне Жыльнікава, асуджанага за забойства трох чалавек. Пра лёс другога асуджанага паводле той жа справы, Сухаркі, пакуль нічога не вядома, але звычайна смяротныя прысуды ў такіх выпадках прыводзяцца ў выкананне адначасова.

Паводле звестак «Радыё Свабода», з 1991 года ў Беларусі вынеслі больш за 300 смяротных прысудаў.