Прафзвязы заклікалі МАП націснуць на ўрад Беларусі

Працоўны кодэкс краіны, імаверна, неўзабаве стане найгоршым у свеце.

Беларускі кангрэс дэмакратычных прафзвязаў (БКДП) заклікае Камітэт ва ўжыванні стандартаў Міжнароднай арганізацыі працы (МАП) выкарыстоўваць усе магчымасці для таго, каб прымусіць Беларусь выконваць правы работнікаў і прафзвязаў. Пра гэта заявіў віцэ-старшыня БКДП Сяргей Антусевіч падчас выступу 15 чэрвеня на 108-й сесіі Міжнароднай канферэнцыі працы ў Жэневе (Швайцарыя).

Сёння Камітэт ва ўжыванні стандартаў МАП разглядае індывідуальны пытанне выканання Беларуссю Канвенцыі №29 аб забароне на выкарыстанне прымусовай працы. Антусевіч удзельнічае ў гэтым мерапрыемстве як дэлегат Міжнароднай канфедэрацыі працы, сябрам якой з'яўляецца БКДП. Ён перадаў БелаПАН тэкст свайго выступу.

«Сітуацыя з працоўнымі правамі ў Рэспубліцы Беларусь, на нашу думку, застаецца складанай, - заявіў прафсаюзны лідар. - Сфера працоўных стасункаў рэгулюецца не Працоўным кодэксам, а дэкрэтамі і ўказамі прэзідэнта. Адным з дэкрэтаў усе працаўнікі пераведзеныя на тэрміновыя працоўныя кантракты. Тым самым гэтая цывілізаваная форма найму праз празмерны распаўсюд пераўтвораная ў разнавіднасць прымусовай працы, бо працаўнікі на сваю ініцыятыву не могуць звольніцца. А Беларусь стала краінай часовай занятасці».

«Яшчэ адным дэкрэтам уведзеная сістэма празмерных пакаранняў і штрафаў для работнікаў, якая мае выяўленыя прыкметы прымусовай працы. За розныя парушэнні працоўнай, вытворчай і выканальніцкай дысцыпліны работнікаў могуць пазбавіць да трох чвэрцяў заробку, і без таго аднаго з самых нізкіх у Еўропе. Дэкрэтам аб так званых дармаедах праца, насуперак Канстытуцыі, абвешчаная не правам, а абавязкам грамадзяніна, непрацуючыя грамадзяне зазнаюць дыскрымінацыю і павінны аплачваць камунальныя паслугі павялічаным тарыфам», - дадаў прафсаюзны лідар.

З ягоных слоў, у краіне таксама прадаўжаюць практыкаваць прымусовую працу «ў сістэме лячэбна-працоўных прафілакторыяў, куды змяшчаюць алкаголікаў». Назва гэтых устаноў, сказаў ён, «не павінна ўводзіць у зман, бо ніякай медыцынскай тэрапіі яны не прадугледжваюць».

«Сістэма ўстаноў з'яўляецца, фактычна, прадаўжэннем традыцый таталітарных рэжымаў 1930-х гадоў мінулага стагоддзя, жорсткага гвалтоўнага прымусу да працы хворых на алкагалізм грамадзян», - растлумачыў ён.

Аналагічны прынцып гвалту над грамадзянамі, сказаў Антусевіч, пакладзены ў аснову «прымусу да працы бацькоў, з сем'яў якіх канфіскавалі дзяцей». «Прыняты закон дыскрэдытуе само паняцце праца, бо ўжываецца прымусова ў якасці сродку перавыхавання асацыяльных элементаў», - перакананы віцэ-старшыня БКДП.

«Нягледзячы на тое, што Беларусь ужо трэцім разам за апошнія чатыры гады дае справаздачу на пасяджэннях камітэта аб выкананні Канвенцыі №29 МАП, урад прадаўжае выкарыстоўваць інструменты прымусовай працы, - заявіў прафсаюзны лідар. - Больш за тое, парламентам у першым чытанні ўжо прыняты закон аб імплементацыі дэкрэтаў аб пераводзе ўсіх работнікаў на тэрміновыя працоўныя кантракты, празмерных пакараннях і штрафах для работнікаў, у Працоўны кодэкс. Тым самым кінуты чарговы выклік прынцыпам і каштоўнасцям МАП, а Працоўны кодэкс краіны, імаверна, стане неўзабаве найгоршым у свеце».

«Мы заклікаем камітэт выкарыстоўваць усе магчымасці для прымусу беларускага ўрада да адмовы ад шматгадовых практык парушэння правоў працоўных і прафзвязаў, грамадзян краіны, ігнаравання ратыфікаваных Канвенцый МАП, уключаючы Канвенцыю №29, міжнародных працоўных нормаў», - падсумаваў Антусевіч.

Сесія Міжнароднай канферэнцыі працы праходзіць з 10 да 21 чэрвеня. У першы дзень працы канферэнцыі Беларусь была ўключаная ў лік 24 краін, дзе сітуацыя з правамі працоўных патрабуе індывідуальнага разгляду.

Яшчэ да пачатку цяперашняй сесіі канферэнцыі ўрад Беларусі прадставіў Камітэту ва ўжыванні стандартаў справаздачу аб выкананні Канвенцыі №29. Гэты дакумент апублікаваны на сайце МАП. З яго вынікае, што Беларусь «цвёрда і паслядоўна падтрымлівае забарону і выкараненне прымусовай працы». Гэты пастулат замацаваны «ў найбольш важных заканадаўчых актах краіны» - Канстытуцыі і Працоўным кодэксе.

На думку беларускага боку, указ прэзідэнта Беларусі №3 ад 2 красавіка 2015 года «Аб садзейнічанні занятасці насельніцтва» і закон №104-З ад 4 студзеня 2010 года «Аб парадку і ўмовах накіравання грамадзян у лячэбна-працоўныя прафілакторыі і ўмовах знаходжання ў іх», на якія раней звярталі ўвагу органы МАП, «не супярэчаць раздзелам Канвенцыі №29». Гэтыя дакументы «накіраваныя на развязанне сацыяльна значных задач - садзейнічанне занятасці насельніцтва і барацьбу з п'янствам і наркаманіяй». Падыходы, вызначаныя ў гэтых дакументах, «адпавядаюць нормам справядлівасці і сацыяльна абгрунтаваныя», сцвярджаюць ва ўрадзе.