Анджэй Дуда ў ЗША: Польшча хоча пастаўляць амерыканскі ЗПГ у краіны Трохмор’я
5- 15.06.2019, 15:47
- 13,515
Польшча імпартуе ўсё менш газу з Расеі.
Польшча павялічыць аб'ём паставак звадкаванага прыроднага газу з ЗША, - паведаміў амерыканскі міністр энэргетыкі Рык Перы ў Тэхасе. Ён суправаджаў прэзідэнта Польшчы Анджэя Дуду падчас ягонага візіту ў ЗПГ-тэрмінал у Сабін Пасе, на мяжы Тэхаса і Луізіяны. Гэта адно з месцаў у ЗША, адкуль адпраўляюцца судны са ЗПГ, паведамляе «Радыё Польшча».
«Польшча імпартуе ўсё менш газу з Расеі і ўсё больш звадкаванага прыроднага газу з розных краін свету, у тым ліку і з ЗША. На гэты момант Варшава падпісала кантракты з амерыканскімі фірмамі на пастаўкі амаль 7 млн тон ЗПГ штогод. Гэта 55% гадавога спажывання газу ў Польшчы», - сказаў Рык Пэры.
Праз некалькі тыдняў у Польшчу з Сабін Паса будзе адпраўлена першая пастаўка ЗПГ.
У сваю чаргу, прэзідэнт Польшчы Анджэй Дуда паўтарыў заяву, што ў рамках ініцыятывы Трохмор’я Польшча хоча пабудаваць злучэнні з краінамі Цэнтральнай і Усходняй Еўропы і пастаўляць туды амерыканскі газ.
«Энэргетычная бяспека патрэбная на ўсёй тэрыторыі паміж Балтыйскім, Адрыятычным і Чорным марамі, на тэрыторыі, дзе яшчэ да нядаўняга часу аднаасобна кіраваў «Газпром», - заявіў польскі прэзідэнт.
Польшча імпартуе газ з некалькіх фірмаў у ЗША.