Да галадаючых у Пухавіцкім раёне «Маці-328» зноў прыязджалі лекары
- 16.06.2019, 18:32
- 9,633
Актывісткі галадаюць ужо шосты дзень.
У вёсцы Востраў Пухавіцкага раёна шосты дзень працягваюць галадоўку тры актывісткі руху «Маці-328», паведамляе «Радыё Свабода».
«Сёння зноў прыязджала «хуткая»: бралі кроў на аналіз, вымяралі ціск. Чыноўнікаў не было. Нічога новага за суткі не адбылося. Магчыма таму, што выходны», - паведаміла ўдзельніца галадоўкі Алла Берналь. З яе слоў, яны не маюць намеру спыняць акцыю пратэсту.
З галадоўнікамі падтрымліваюць сувязь і іншыя актывісткі руху «Маці-328».
Удзельніцы галадоўкі патрабуюць:
- Сустрэчы з Лукашэнкам
- Гуманізацыі антынаркатычнага заканадаўства
- Перагляду спраў па 328-м артыкуле
- Прыбраць з закона паняцце «асабліва небяспечныя наркотыкі».
- Адстаўкі старшыні Вярхоўнага суда Валянціна Сукалы.
- Роспуск «палаты прадстаўнікоў» «нацыянальнага сходу».
Галадоўку з аналагічнымі патрабаваннямі актывісткі праводзілі ў мінулым годзе ў красавіку - траўні. Тую галадоўку яны спынілі пасля таго, як ім паабяцалі, што «палата прадстаўнікоў» разгледзіць змены ў 328-ы артыкул Крымінальнага кодэкса.
«Палата прадстаўнікоў» сёлета 13 чэрвеня прыняла папраўкі, згодна з якімі ніжняя мяжа пакаранняў знізілася на два гады: да трох гадоў па 2-й частцы артыкула і да шасці гадоў па 3-й частцы.
«Маці-328» уважаюць гэтыя змены недастатковымі.