У кваліфікацыі Лігі Чэмпіёнаў БАТЭ згуляе з чэмпіёнам Польшчы

Футбольныя фанаты польскага і беларускага клубаў падтрымліваюць сяброўскія стасункі.

У Ньёне адбылося лёсаванне 1-га кваліфікацыйнага этапу Лігі чэмпіёнаў-2019/20 па выніках якога чэмпіёну Беларусі БАТЭ выпала спаборнічаць з польскім «Пястам», піша "Прессбол".

Першы матч пройдзе 9 або 10 ліпеня ў Барысаве, у адказ - 16 або 17 ліпеня ў Глівіцэ.

Як вядома, фанаты барысаўскага БАТЭ і «Пяста» з Глівіцэ падтрымліваюць сяброўскія стасункі.

Іх стасункі пачаліся ў 2010-м, калі пасля еўравыезду ў Капенгаген барысаўцы зазірнулі на хатні матч «сіне-чырвоных» з «Катавіцэ». «Беларусы былі спаленыя гаспадарамі, але да іх паставіліся па-сяброўску, і з таго часу пачаўся шчыльны кантакт паміж прадстаўнікамі абедзвюх груповак», - інфармуе Ultras Wiki. Фанацкі саюз БАТЭ і «Пяста» быў аформлены ў жніўні 2011-га на лігачэмпіёнскім матчы ў Грацы. З тых часоў заўзятары каманд увесь час падтрымліваюць сувязь, наведваюць матчы хаўруснікаў. Але так, як паміж Барысавам і Глівіцэ тысяча кіламетраў і візавы рэжым, рабіць гэта няпроста. Польскія «кібіцы» кампенсуюць дэфіцыт выездаў у Беларусь падтрымкай барысаўскай каманды на еўрапейскай арэне, а барысаўцы па меры магчымасцяў выбіраюцца на матчы экстракласу.