Відэафакт: Паляк ездзіў на танку Т-55 па начным горадзе

Ён спрабаваў правесці экскурсію для сяброў.

Жыхар гарадка Паенчно ў Лодзінскім ваяводстве Польшчы катаўся п'яным па горадзе на савецкім сярэднім танку Т-55. З яго дапамогай ён спрабаваў правесці начную экскурсію для сяброў, піша Twoje Pajeczno.

Інцыдэнт адбыўся ў чацвер, 13 чэрвеня. Дзяжурны афіцэр паліцыі ў Паенчно атрымаў інфармацыю, што па адной з галоўных вуліц горада едзе танк. Сапраўды, на вуліцы Міцкевіча паліцыянты выявілі прыпаркаваны на праезнай частцы танк і людзей побач з ім.

Неўзабаве высветлілася, што 49-гадовы мясцовы жыхар, якому належала баявая машына, сеў на месца механіка-кіроўцы і вёз сваіх сяброў на брані з экскурсійнымі мэтамі. Тэст выявіў, што мужчына нецвярозы.

Расследаванне выявіла, што танк першапачаткова перавозіўся на прычэпе, але той зламаўся. Пасля гэтага нецвярозы гаспадар прыняў пастанову паездзіць на Т-55 ужо «сваім ходам». Пры гэтым танк не застрахаваны, а мужчына не мае права ім кіраваць. За танкавую экскурсію гаспадар можа быць асуджаны адразу паводле двух артыкулаў: да 2 гадоў за кіраванне ў нецвярозым стане і да 8 гадоў за стварэнне небяспекі аварыі.