Кватэры ад УКБ у Менску, за якімі стаялі ў мароз, выставілі на продаж

Надбаўка - да $500 з «квадрата».

У студзені мінулага года УКБ Мінаблвыканкама «выкінуў» у вольны продаж першыя кватэры ў маналітна-каркасным доме ў раёне вуліцы Калініна, што будаваўся. Нягледзячы на сярэдні па рынку кошт квадратнага метра ($1200 па курсе), каля офіса забудоўшчыка ўтварылася чарга, у якой людзі дзяжурылі два дні. У дзень падачы заяў на 23 кватэры прэтэндавалі больш за 60 чалавек. Ажыятаж быў абумоўлены размяшчэннем дома: у пешай даступнасці знаходзяцца дзве станцыі метро і парк Чалюскінцаў. Да таго ж бонусам у кошт метра было ўключанае адно парковачнае месца на стаянцы. Нядзіўна, што пасля здачы дома ў эксплуатацыю многія ўласнікі паспяшаліся выставіць свае «квадраты» на продаж, піша «Онлайнер».

Зараз у новабудоўлі прапануецца блізу 10 кватэр. Да прыкладу, за трохпакаёўку на першым паверсе плошчай 76,2 кв. м просяць $115 000 паводле курсу ($1509 за метр). «Размяшчэнне кватэры дазваляе выкарыстоўваць яе пад камерцыйныя патрэбы: цырульня, пральня, касметычны салон, офіс, крама - усё што заўгодна, - удакладняе ў аб'яве агент. - Свабодная планіроўка дазволіць рэалізаваць любыя вашы жаданні».

За двухпакаёўку плошчай 59 кв. м на 12-м паверсе ўласнік разлічвае атрымаць $90 000 паводле курса ($1525 за метр). «Побач з домам спакойны зялёны двор з высокімі дрэвамі, у пешай даступнасці школа, гімназія, дзіцячы сад. З вокнаў адкрываецца выдатны краявід на парк Чалюскінцаў і Батанічны сад», - піша ўласнік.

За $90 900 выстаўленая на продаж двухпакаёўка плошчай 64,1 кв. м на 11-м паверсе. Абавязковай умовай прадавец называе куплю месцы ў паркінгу - яшчэ $6000, з улікам чаго «квадрат» каштуе $1511.

Аднапакаёвая кватэра на другім паверсе плошчай 44 кв. м прапануецца за $63 000 у эквіваленце. Яшчэ $12 000 просяць за месца ў паркінгу. У агульнай складанасці кошт метра выстрэльвае да $1704.

Мацней за ўсё апетыт разыграўся ва ўласніка двухпакаёвай кватэры плошчай 59,2 кв. м на другім паверсе, якая выстаўлена на продаж за $104 000 згодна з курсам ($1756 за метр). Машына-месца на стаянцы ўключаная ў гэты кошт.

Няхітрыя падлікі паказваюць, што ў выпадку паспяховага продажу надбаўка складзе $19 200-33 000 у залежнасці ад плошчы кватэры. Такім чынам, паўтараецца гісторыя з домам у Навінках, дзеля кватэр у якім перакупшчыкі дзяжурылі на марозе некалькі тыдняў і адразу ж па выдачы ключоў выкінулі абвесткі аб продажы жылля з надбаўкай $10 000-25 000.

Дадамо, што ў дзеяннях уласнікаў кватэр няма нічога супрацьзаконнага. Якіх-небудзь абмежаванняў на продаж пабудаваных УКБ кватэр не існуе, а кошт фармуе рынак.