Кіраўніца «Беллегпрама» напала на сэканд-хэнды

На яе думку, сфера патрабуе дадатковага рэгулявання.

Таццяна Лунгіна, старшыня канцэрна «Беллегпрам», мяркуе, што гандаль сэканд-хэнд у краіне патрабуе дадатковага рэгулявання. Пра гэта яна распавяла ў праграме «Неделя» на тэлеканале СТВ, піша tut.by.

- Што да сэканд-хэндаў у мяне ёсць свой пункт гледжання і адносна ІП таксама, - распавяла ў эфіры тэлеканала СТВ новая старшыня канцэрна «Беллегпрам» Таццяна Лунгіна, якая нядаўна ўзначальвала пінскае «Палессе».

На яе думку, сфера патрабуе дадатковага рэгулявання.

- Трэба больш паглыбіцца ў знаходжанне менавіта сэканд-хэнду на рынку Рэспублікі Беларусь. Умовы ўваходу гэтай прадукцыі, яе класіфікацыя і інвентарызацыя - што рэальна ўваходзіць у падкатэгорыя сэканд-хэнд. На якіх умовах яны ўваходзяць, якімі мытамі абкладаюцца? У гэтае пытанне будзем паглыбляцца, вывучаць і, вядома ж, будзем для сябе разумець, што нам трэба рабіць для таго, каб гэтая дынаміка не працягвалася.

Таксама старшыня «Беллегпрама» ў эфіры распавяла, што хоча пагрузіцца ў асартыментную палітыку нашых прадпрыемстваў.

- Для каго, для чаго, ці чакае пакупнік той асартымент, ці патрэбны ён? - сказала яна. - Хочацца, каб нашы людзі былі апранутыя, і прыгожа апранутыя, у нашу прадукцыю. Будзем прыкладаць максімум намаганняў (...), каб любоў да беларускага адзення ў насельніцтва толькі прырастала.