Як намеснік міністра працы вучыў пенсіянераў выжываць

Пра што забыўся згадаць чыноўнік?

На онлайн-канферэнцыі жыхар Барысава пацікавіўся, ці рэальна, на думку намесніка міністра працы, пенсіянеру пражыць на сярэднюю пенсію, якая ледзь-ледзь перавышае 400 рублёў, піша «Салiдарнасць».

- І ці будзе гэта паўнавартасным жыццём, на ваш погляд, ці выжываннем? Гаворка не ідзе пра падарожжы на пенсіі па краіне і за межамі краіны (як робяць тыя ж еўрапейскія пенсіянеры, якія могуць на адпачынку падарожнічаць), а аб банальнай магчымасці набыць нармальную ежу, а не эканоміць на кожнай капейцы.

Намеснік міністра працы і сацыяльнай абароны Валерый Кавалькоў заўважыў, што «ўзровень дзяржаўных пенсій залежыць ад эканамічных магчымасцяў і вызначаецца аб'ёмам наяўных пенсійных сродкаў».

Пры гэтым чыноўнік дадаў, што жыццё на пенсіі нельга разглядаць толькі праз прызму дзяржаўнага пенсійнага забеспячэння. Ён прывёў прыклад, як за мяжой практыкуецца фармаванне работнікамі дадатковых пенсійных зберажэнняў у страхавых кампаніях, банках, да якіх можна звярнуцца ў пенсійны перыяд. З ягоных слоў, менавіта гэтыя зберажэнні дазваляюць пенсіянерам падарожнічаць. Кавалькоў звярнуў увагу на тое, што ў Беларусі таксама ёсць магчымасці фармаваць дадатковыя зберажэнні на старасць.

У пытанні пра залежнасць ад эканамічных магчымасцяў, чыноўнік відавочна выпусціў той момант, што гэтыя самыя магчымасці наўпрост залежаць ад дзяржавы. Менавіта яна абавязаная стварыць сваім грамадзянам усе неабходныя ўмовы для развіцця, працы і магчымасці забяспечыць сабе годнае жыццё на пенсіі.

Мы ж дзясяты год назіраем сітуацыю беспаспяховага штурму некалі абяцанай планкі заробкаў «папяцьсот». І поўнае нежаданне праводзіць як паветра неабходныя рэформы ў эканоміцы.

Дадатковыя зберажэнні - гэта добра, хто б спрачаўся. Але ці шматлікія сёння могуць адкласці на старасць, калі атрымліваюць мізэрныя заробкі? І гэта таксама наўпроставае следства шматгадовага ручнога кіравання эканомікай.

І апошняе. Пасля шэрагу дэвальвацый ладна патрапаныя ўклады тысяч беларусаў, шмат хто проста асцерагаюцца несці свае крэўныя ў банкі і страхавыя кампаніі.