Відэафакт: У Тбілісі дэпутата РФ аблілі вадой і закідалі бутэлькамі
25- 20.06.2019, 19:37
- 29,470
Расейскі дэпутат уцякаў ад актывістаў пад аховай.
У Тбілісі грамадскія актывісты аблілі вадой дэпутата Дзярждумы РФ Сяргея Гаўрылава і іншых сябраў расейскай дэлегацыі, якія прыбылі ў Грузію на сесію Міжпарламенцкай асамблеі праваслаўя.
Пра гэта паведамляе агенцтва «Новости-Грузия».
Сёння ў Грузіі разгарэўся скандал праз тое, што расейскі дэпутат, сябра Камуністычнай партыі Сяргей Гаўрылаў адкрыў сесію асамблеі, седзячы ў крэсле спікера парламента. Працягнуць выступ Гаўрылаву не дазволілі дэпутаты апазіцыйных партый «Еўрапейская Грузія» і «Адзіны нацыянальны рух» - яны заблакавалі трыбуну.
Пасля зрыву пасяджэння сябры расейскай дэлегацыі вярнуліся ў гатэль Radisson на плошчы Першай Рэспублікі ў цэнтры Тбілісі. Ля ўваходу ў будынак на працягу трох гадзін доўжылася акцыя пратэсту, удзельнікі якой патрабавалі, каб Гаўрылаў публічна папрасіў прабачэння за свае дзеянні і неадкладна пакінуў краіну.
Некаторыя пратэстоўцы спрабавалі патрапіць унутр будынка і патрабавалі сустрэчы з Гаўрылавым. На месца была мабілізаваная вялікая колькасць супрацоўнікаў МУС Грузіі.
Урэшце дэпутат Дзярждумы РФ і іншыя ўдзельнікі расейскай дэлегацыі пакінулі гатэль. З будынка іх выводзілі пад аховай крымінальнай і патрульнай паліцыі. Некалькі чалавек спрабавалі перашкодзіць іх перамяшчэнню, яны аблілі групу вадой і закідалі бутэлькамі.
Паводле інфармацыі тэлеканала «Руставі 2», дэлегаты РФ селі ў мікрааўтобус, які выехаў да Тбіліскага аэрапорта. Чакаецца, што яны вылецяць у Маскву найбліжэйшым рэйсам.
Як паведамлялася, кіраўніцтва кіруючай партыі Грузіі патлумачыла ўдзел расейскага камуніста ў пасяджэнні «пратакольнай памылкай». Паводле звестак СМІ, у сувязі з падзеямі ў парламенце ў адстаўку падасць спікер грузінскага парламента.