«Баста»: Для Лукашэнкі набліжаюцца небяспечныя часы

Ёсць прычыны для новаўвядзенняў у закон пра войска, пра якія маўчаць улады.

Цывілізаваныя краіны пераходзяць да кантрактнай прафесійнай арміі, а ў Беларусі ўдасканальваюць прыгоннае права. Такое ўражанне ўзнікае пасля азнаямлення з праектам закона "Аб змяненні законаў у пытаннях эфектыўнага функцыянавання ваеннай арганізацыі дзяржавы". Дакумент істотна робіць больш жорсткімі правілы прызыву на вайсковую службу і наступствы для беларусаў, якія не служылі ў войску "без законных падставаў". Дакумент унесены ў "парламент" у тэрміновым парадку, плануецца да прыняцця ў двух чытаннях на гэтай сесіі, піша тэлеграм-канал "Баста".

Найбольшае абурэнне беларусаў выклікалі два новаўвядзенні:

1. Адтэрміноўка ад службы арміі падаецца толькі адзін раз. Магістратуры без армейскага досведу не ўбачыць, як сваіх вушэй.

2. Тым, хто "належна апавешчаны і не з'яўляецца на мерапрыемствы для прызыву", забароняць выезд за мяжу. Пра вучобу ў еўрапейскіх ВНУ можна будзе забыцца.

Само сабой, прысутнічае пункт пра збор і апрацоўку персанальных звестак грамадзянаў, якiя стаяць або абавязаныя стаяць на воiнскi улiк без іх пісьмовай згоды. Яго, напэўна, цяпер у кожны закон устаўляць будуць. Айцікраіна, усё ж.

Улады не хаваюць прычыну спешнай распрацоўкі праекта. Ахвотных служыць у лукашэнкаўскай арміі з кожным годам усё менш. Ад казарменнага рабства беларусы бягуць, як ад чумы. Але падобнымі захадамі баяздольнасць арміі не паднімеш. Іржавую тэхніку новымі законамі працаваць не прымусіш, а забароны і абмежаванні не дададуць матывацыі для службы. Нават вузкалобыя чыноўнікі з Мінабароны павінны гэта разумець.

Ёсць і іншыя прычыны новаўвядзенняў, пра якія маўчаць улады, але ведаюць усе беларусы.

Навабранцы – бясплатная працоўная сіла, якую можна кінуць куды заўгодна. Ад уборкі бульбы і капусты на калгасных палях – да будаўніцтва чарговага палаца для дармаеда-чыноўніка. Ні для кога не сакрэт, што менш за ўсё ў беларускай арміі вучаць ваяваць.

Акрамя таго, набліжаюцца небяспечныя часы для Лукашэнкі. Дзве выбарчыя кампаніі і грозныя патрабаванні з Масквы на фоне будучай эканамічнай катастрофы не даюць спакойна спаць. Больш жорсткія правілы прызыву – гэта нязграбная спроба ўтрымаць маладых людзей ад выхаду на вуліцы.

Небяспечная гэта справа – спрабаваць павялічыць войска без ягонай рэформы. Карміць там лепш не стануць, заробкі афіцэраў не вырастуць, ільготаў не дадасца. Галодныя і злыя салдаты ніколі не стануць абараняць таго, хто ператварыў іх у прыгонных. Беларусь намаганнямі Лукашэнкі стала краінай трэцяга свету. На што здольная армія ў такіх краінах, мы ўсе ведаем.

Сцягвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Баста» і стварайце гісторыю свабоднай Беларусі.