17 жнiўня 2019, Субота, 16:48
Мы ў адной лодцы
Рубрыкі

Золата падаражэла да максімуму за шэсць гадоў

15
Золата падаражэла да максімуму за шэсць гадоў

Кошт на высакародны метал расце праз геапалітычную сітуацыю.

Золата падаражэла да максімуму за апошнія шэсць гадоў. Але гендырэктар другой паводле велічыні ў Расеі золатаздабывальнай кампаніі Polymetal Віталь Несіс не бачыць прычынаў для далейшага росту

Кошт на золата з тэрміновай пастаўкай паводле вынікаў гандлю на Лонданскай біржы металаў у панядзелак, 24 чэрвеня, павысіўся на 1,4% – да $ 1439,21 за унцыю. У папярэдні раз так дорага золата каштавала ў траўні 2013 года. Раніцай у аўторак каштоўны метал гандляваўся на ўзроўні $ 1428,3 за унцыю, паведамляе РБК.

«Цяперашні ўзлёт коштаў – гэта вынік змены чаканняў у стаўцы ў ЗША і эскалацыі напружання ў стасунках ЗША і Ірана», – заявіў РБК гендырэктар другой паводле велічыні ў Расеі золатаздабывальнай кампаніі Polymetal Віталь Несіс.

24 чэрвеня прэзідэнт ЗША Дональд Трамп увёў чарговыя санкцыі ў дачыненні да Ірана, на гэты раз абмежаванні закранулі вярхоўнага лідара Ірана аяталы Алі Хаменеі. Новы віток канфлікту паміж Іранам і ЗША пачаўся пасля таго, як на мінулым тыдні Іран збіў амерыканскі выведвальны беспілотнік, які, паводле сцвярджэння Корпуса вартавых ісламскай рэвалюцыі, уварваўся ў паветраную прастору краіны. Але ў ЗША тады заявілі, што амерыканскага дрона не было ў паветранай прасторы Ірана.

Акрамя геапалітычнай напружанасці, росту коштаў на золата спрыялі заявы Федэральнай рэзервовай сістэмы (ФРС) ЗША і цэнтрабанкаў іншых краінаў пра верагоднае зніжэнне базавай адсоткавай стаўкі. Інвестары, чакаючы паслаблення даляра, сталі пераносіць ашчаджэнні ў біржавыя фонды (ETF), забяспечаныя фізічным золатам, а таксама ўкладвацца ў залатыя ф'ючарсы і апцыёны. Сусветныя цэнтрабанкі таксама павялічылі закупкі золата. Золатавалютныя рэзервы Расеі на стан 14 чэрвеня выраслі да $ 504,5 млрд, рост за тыдзень склаў $ 1,8 млрд (0,4%), паведамляецца на сайце Банка Расеі. Гэта максімальнае значэнне з сакавіка 2014 года.

«$ 1400 за унцыю – гэта выдатна, але ўжо зашмат. Я не веру, што будзе рух далей наверх. Гэта значыць, $ 1500 сёлета мы дакладна не ўбачым», – падкрэсліў Несіс. Кіраўнік аддзела аналітычных даследаванняў Альфа-банка Барыс Краснажонаў згаджаецца, што наўрад ці сярэдні кошт золата за трэці і чацвёрты кварталы 2019 года перавысіць адзнаку $ 1500 за унцыю. «Калі будзе два-тры зніжэнні [базавай адсоткавай] стаўкі да канца года, то кошт у трэцім квартале можа быць на ўзроўні $ 1420 і, магчыма, $ 1450–1470 паводле чацвёртага кварталу. Калі ж ФРС не будзе зніжаць стаўку да канца года, то золата вернецца на ўзровень $ 1300–1350 у другім паўгоддзі», – сказаў эксперт.

Аднак дырэктар групы карпаратыўных рэйтынгаў АКРА Максім Худалаў мяркуе, што праз рост напружанасці ў геапалітыцы і сусветным рынку кошт на золата можа падняцца і вышэй за $ 1500 за унцыю. А старэйшы аналітык БКС Алег Петрапаўлаўскі дадаў, што і мэта $ 1600 за унцыю золата дасягальная, «калі Трамп прадоўжыць ціснуць на Іран і ваяваць з Кітаем».