Столтэнберг: NATO рыхтуе адказ, калі РФ не вернецца да ядзернай дамовы

Міністры краінаў Альянсу разгледзелі патэнцыйныя захады.

NATO разглядае шляхі ўмацавання абароны супраць пагрозы новых расейскіх ракетных сістэмаў, калі Расея да жніўня не вернецца да выканання Дамовы пра ліквідацыю ракетаў сярэдняй і меншай далёкасці.

Як паведамляе "Еўрапейская праўда", пра гэта заявіў генеральны сакратар NATO Енс Столтэнберг паводле вынікаў першага дня міністэрскай сустрэчы ў Брусэлі.

"Расейскія ракеты SSC-8 парушаюць дамову і ўяўляюць з сябе істотную пагрозу для нашай бяспекі. Сёння міністры пагадзіліся, што NATO адкажа, калі Расея не вернецца да захавання дамовы", – сказаў Столтэнберг.

Паводле ягоных словаў, міністры разглядалі патэнцыйныя захады NATO, як: праграма вучэнняў, а таксама выведка і назіранне; умацаванне паветранай і супрацьракетнай абароны; бяспека і эфектыўнасць праграмы ядзернага стрымлівання.

"Міністры пацвердзілі сёння, што мы не маем намеру размяшчаць новыя наземныя ядзерныя ракеты ў Еўропе. Мы не будзем адлюстроўваць тое, што робіць Расея. Мы не хочам новай гонкі ўзбраенняў", – дадаў генеральны сакратар.

Раней Столтэнберг заявіў, што ў Расеі ёсць час да 2 жніўня, каб вярнуцца да захавання дамовы і знішчыць свае крылатыя ракеты, што парушаюць гэты дакумент.

Нагадаем, 18 чэрвеня ў Расеі прынялі прэзідэнцкі закон пра спыненне дзеяння Дамовы аб ліквідацыі ракетаў сярэдняй і малой далёкасці.

Як вядома, восенню 2018 года прэзідэнт ЗША Дональд Трамп заявіў, што Расея парушае ўмовы ДРСМД, і ў гэтай сітуацыі ягонае захавання невыгоднае Злучаным Штатам. У снежні дзяржсакратар ЗША Майк Пампеа высунуў ультыматум Расеі, запатрабаваўшы цягам 60 дзён знішчыць або мадыфікаваць ракету 9М729, што, як сцвярджаюць у Вашынгтоне, паводле сваіх паказнікаў парушае ДРСМД.

2 лютага Злучаныя Штаты спынілі свае абавязальніцтвы паводле Дамовы і пачалі працэс выхаду з яе. Калі Расея не вернецца да выканання ўмоваў пагаднення, працэс выхаду закончыцца праз шэсць месяцаў.

Расея адмаўляла ўсе абвінавачванні ЗША.