Апытанне: У Вярхоўную раду Украіны праходзяць пяць партый
4- 27.06.2019, 19:43
- 10,437
Пра гэта сведчаць звесткі апытання кампаніі Info Sapiens.
Калі б датэрміновыя парламенцкія выбары праходзілі ва Украіне ў найбліжэйшую нядзелю, у Вярхоўную раду мелі б шанец прайсці пяць партый. Пра гэта сведчаць звесткі апытання кампаніі Info Sapiens, праведзенага 15-25 чэрвеня, перадае rbc.ua.
Паводле звестак апытання, партыя "Слуга народа" можа атрымаць 46,5% галасоў тых, хто мае намер галасаваць і вызначыўся з выбарам.
Далей ідуць "Апазіцыйная платформа - За жыццё" (11,8%), "Еўрапейская салідарнасць" (8,6%), "Голас" (8,2%) і "Бацькаўшчына" (7,8%).
Астатнія партыі набіраюць менш за 5% галасоў украінцаў, якія вызначыліся з выбарам.
Апытанне Info Sapiens праведзенае 15-25 чэрвеня сярод 1290 чалавек ва ўсёй Украіне, за выключэннем акупаваных Расеяй тэрыторый. Максімальная тэарэтычная хібнасць не перавышае 2,7% для паказчыкаў, блізкіх да 50%, 1,6% для паказчыкаў, блізкіх да 10%, 1,2% для паказчыкаў, блізкіх да 5%.
Адзначым, са звестак апытання Сацыялагічнай групы "Рэйтынг", праведзенага 20-24 чэрвеня ў парламент праходзяць пяць партый: "Слуга народа", якую гатовыя падтрымаць 45,3% тых, хто мае намер галасаваць і вызначыўся з сімпатыямі, а таксама "Апазіцыйная платформа - за жыццё "(12,1%)," Голас"(8,4%)," Еўрапейская Салідарнасць"(7,2%) і "Бацькаўшчына" (7,0%).