Бацька інспектара ДАІ Патаповіча: Зрабіў памылку, што не агледзеў цела ў моргу

Уладзімір Патаповіч намагае, што ягонага сына забілі.

Уладзімір Патаповіч, бацька магілёўскага інспектара ДАІ Яўгена Патаповіча, які загадкава загінуў 16 траўня, не адмаўляецца ад намеру дамагацца эксгумацыі цела сына.

Пра гэта ён заявіў «Свабодзе» пасля апошняга паведамлення Следчага камітэта пра расследаванне абставінаў сына смерці. Са слоў кіраўніка структуры Івана Наскевіча, самагубства міліцыянта не здымаецца з ліку прыярытэтных версій.

Уладзімір Патаповіч не верыць у самагубства сына і намагае, што яго забілі. Пакуль ён не гатовы звязваць смерць Яўгена з прафесійнай дзейнасцю.

На эксгумацыі Уладзімір Патаповіч будзе намагаць, калі стануць вядомыя вынікі судова-медыцынскай экспэртызы. Ён хоча пераканацца, ці ёсць пашкоджанні ў пахвіннай вобласці цела. Акрамя таго ён заўважыў на барадзе сына пашкоджанне, падобнае на рэзаную рану, і хацеў бы даведацца, адкуль яно.

Аб пашкоджанні ў ніжняй частцы цела Уладзімір Патаповіч кажа, спасылаючыся на фотаздымак з інтэрнэту (з тэлеграм-каналу блогера NEXTA).

«Я зрабіў памылку, калі адмовіўся ад удзелу ў працэдуры апазнання цела і не агледзеў яго ў моргу. Тады ж заяўлялася пра забойства. Цяпер кажуць пра суіцыд. З гэтым не згаджаюся, бо мяркую, што сына забілі», - кажа Уладзімір Патаповіч.

Тыдзень таму Уладзімір Патаповіч казаў, што агледзець цела сына жаданне было, але яго і былую жонку Вольгу пераканалі, што рабіць гэтага не варта з «этычных меркаванняў, каб не палохаць пашкоджаннямі на целе».

СК версію пра самагубства міліцыянта не здымае з ліку прыярытэтных. Са слоў яго старшыні Івана Наскевіча, «у апошнія дні атрыманы шэраг заключэнняў, якія ўмацоўваюць пазіцыю, што менавіта гэта і адбылося». Аб расследаванні смерці інспектара ДАІ кіраўнік Следчага Камітэта распавёў журналістам 4 чэрвеня.