Віцебскія студэнты прыдумалі бронемайку
21- 6.06.2019, 21:03
- 21,523
Бронефутболка здольная выратаваць ад нажа і агнястрэлу.
Двое віцебскіх студэнтаў з ВДТУ прыдумалі і сшылі бронемайку. На задуму Алены Фёдаравай і Дзмітрыя Костэшава адзенне выглядае як звычайная футболка. Пра тое, што ў спецыяльных кішэнях з выварату хаваюцца бронепласціны, якія абараняюць гаспадара ад удару нажа і некалькіх відаў агнястрэльнай зброі, ведае толькі ён сам. Ну і тыя, хто пашыў футболку, піша kp.by.
Бронемайка пакуль што існуе ў адзіным экзэмпляры. Цяпер Дзмітрый выпрабоўвае яе на сабе. Кажа, летам гарачаватая і цяжкаватая. А вось для вясны і восені - як раз! Праўда, замест бронепласцін эксперыментальны ўзор футболкі абсталяваны звычайнымі металічнымі, падыходнымі па вазе. Сапраўдныя бронепласціны - штука дарагая, і двум віцебскім студэнтам купіць іх пакуль што нерэальна. Пра тое, дзе знайсці пастаўшчыкоў пласцін, хлопцы будуць думаць, калі ім атрымаецца запусціць бронеадзенне ў вытворчасць.
- Такую футболку можна апранаць на масавыя мерапрыемствы, у такія месцы, дзе можа быць пагроза тэрарыстычнага акту, - распавядае Дзмітрый. - Напрыклад, на футбольны матч, калі ёсць небяспека, што ўспыхне бойка сярод фанатаў. У Еўропе зараз шмат тэрарыстычных актаў, пакутуюць людзі. Мы хочам, каб нашы людзі былі ў бяспецы.
Арыенціровачны кошт футболкі без бронепласцін - блізу 45 даляраў.
- Гэта таму, што яна пашытая з адмысловай шчыльнай тканіны, здольнай вытрымаць вагу бронепласцін і не разарвацца, не дэфармавацца, - тлумачыць Алена. - Нават ніткі спецыяльна падабраныя.
Дарэчы, калі ў кагосьці дома выпадкова валяюцца бронепласціны, Алена і Дзмітрый гатовыя пашыць на замову не толькі футболку, але і любое адзенне з абаронай. Хоць фрак, хоць вясельную сукенку. Распрацуюць фасон, падбяруць прыдатныя матэрыялы, прадумаюць, як размясціць пласціны, каб яны ў выпадку небяспекі прыкрывалі жыццёва важныя органы.
Свой праект пад назвай «Нябачная абарона» хлопцы паказалі на Міжнародным чэмпіянаце «Моладзь і прадпрымальніцтва-2019».