Пуцін даручыў перазняць серыял «Чарнобыль», у якім ЦРУ стане вінаватай у катастрофе

Здымкамі зоймецца тэлеканал НТВ.

Прэзідэнт Расеі Уладзімір Пуцін даручыў расейскаму канала НТВ стварыць сваю версію серыяла пра катастрофу на Чарнобыльскай атамнай электрастанцыі ў 1986 годзе, піша «Новое время».

Расейская версія тэлесерыяла, прысвечанага чарнобыльскай трагедыі будзе знятая пры падтрымцы Мінкульта РФ, паведамляе амерыканскі часопіс Maxim.

Галоўным героем серыяла стане не ліквідатар аварыі, а супрацоўнік савецкіх спецслужбаў - падпалкоўнік вайсковай контрвыведкі Андрэй Нікалаеў, які будзе шукаць супрацоўніка ЦРУ Альберта Ленца, каб прадухіліць выбух на ЧАЭС.

«Дзеянне серыяла разгортваецца з красавіка да снежня 1986 года. Украінскаму аддзелу КДБ СССР становіцца вядома пра цікавасць, праяўленую замежнымі спецслужбамі да Чарнобыльскай атамнай электрастанцыі», - паведамляецца ў сінопсісе расейскага Чарнобыля.

Здымкі альтэрнатыўнай версіі серыяла Чарнобыль ужо стартавалі. Як адзначыў рэжысёр праекта Аляксей Мурадаў, сюжэт створаны на адной з тэорый, згодна з якой прычынай выбуху сталі дзеянні супрацоўніка ЦРУ:

«Паводле адной з тэорый, амерыканцы праніклі на Чарнобыльскую АЭС, і многія гісторыкі не адмаўляюць, што ў дзень выбуху агент спецслужбаў апанента прысутнічаў на станцыі», - паведаміў ён.

Рэдакцыя Maxim адзначыла, што здымкі серыяла сталі яшчэ адным довадам таго, што сучасная Расея нічым не адрозніваецца ад СССР:

«Гэта даволі добры аргумент для разумення таго, што сённяшняя Расея напраўду справе нічым не адрозніваецца ад СССР. Пуцін быў афіцэрам КДБ падчас чарнобыльскай аварыі, і няма ніякіх падстаў меркаваць, што падзенне камуністычнага рэжыму зрабіла яго менш дасведчаным у тым, як урад можа стварыць сваю праўду. Аднак праблема ў тым, што HBO настолькі добра паказала гэтую гісторыю, што, відавочна, гэтую прапагандысцкую бітву ўжо саступілі», - адзначае рэдакцыя амерыканскага мужчынскага глянцу.