Ультраправыя засталіся без кіроўных пасад у Еўрапарламенце

Праеўрапейскія партыі аб'ядналіся супраць папулістаў.

Вядучыя партыі ў Еўрапарламенце заблакавалі кандыдатуры, прадстаўленыя ультраправай фракцыяй «Ідэнтычнасць і дэмакратыя» (ID) на пасады старшыняў парламенцкіх камітэтаў. Пасля вынікаў галасавання 10 ліпеня ультраправыя не атрымалі старшынства ў аніводным з 20 камітэтаў, хоць з'яўляюцца пятай паводле колькасці фракцыяй, паведамляе РБК.

Пасады кіраўнікоў камітэтаў размяркоўваюцца паміж партыямі паводле метаду, які ўлічвае колькасць фракцый. Згодна з гэтым метадам «ідэнтычнасці і дэмакратыі», што кантралюе 73 крэслы, ім належала старшынстваваць у двух камітэтах - у сельскай гаспадарцы і юрыдычным.

Аднак для зацвярджэння на гэтыя пасады ультраправым была патрэбная падтрымка большасці дэпутатаў, якія ўваходзяць у гэтыя камітэты. Тры найбуйнейшыя праеўрапейскія фракцыі - Еўрапейская народная партыя (182 дэпутаты), Альянс сацыялістаў і дэмакратаў (154) і «Абновім Еўропу» (104) раней заяўлялі, што не дазволяць ультраправым заняць пазіцыі на кіроўных пасадах. Супраць ультраправых выступіла і Партыя зялёных (74 дэпутаты). У выніку новым кіраўніком камітэта сельскай гаспадаркі стаў «народнік» - немец Норбэрт Лінс, а камітэта ў юрыдычных пытаннях - прадстаўнік «Абновім Еўропу» брытанка Люсі Нетсінга.

Раней праеўрапейскія партыі адмовіліся прызначаць ультраправых у кіраўніцтве Еўрапарламенту, куды ўваходзяць старшыня і ягоныя 14 намеснікаў. У выніку галасавання старшынём парламента стаў сацыяліст - італьянец Давід Сасолі. Сярод ягоных намеснікаў пяць «народнікаў», тры сацыялісты, два лібералы з фракцыі «Абновім Еўропу», два прадстаўнікі Партыі зялёных, адзін чалец групы «Аб'яднаных еўрапейскіх левых» і адзін незалежны дэпутат.

Фракцыя ультраправых, куды ўваходзіць французская партыя «Нацыянальнае аб'яднанне» Марын Ле Пэн і італійская «Ліга» віцэ-прэм'ера Матэа Сальвініі, засталіся без кіроўных пасад у парламенце ўжо другім разам. Пасля выбараў у 2014 годзе ультраправыя не змаглі своечасова зарэгістраваць сваё аб'яднанне і праз гэта не ўдзельнічалі ў размеркаванні пастоў старшыняў камітэтаў.

Пасады найбольш уплывовых камітэтаў атрымалі прадстаўнікі двух найбуйнейшых сіл у парламенце - Еўрапейскай народнай партыі і Альянсу сацыялістаў і дэмакратаў. Старшынём камітэта ў замежных справах стаў сябра «народнікаў» Дэвід Макалістэр, а старшынём камітэта ў эканоміцы - сацыяліст Рабэрта Гуалт’еры.