Вярхоўная Рада прыняла новы Выбарчы кодэкс Украіны

За дакумент прагаласавалі 230 дэпутатаў.

Вярхоўная Рада Украіны 11 ліпеня прыняла ў другім чытанні праект Выбарчага кодэкса Украіны (законапраект №3112-1), піша gordonua.com.

За дакумент з папраўкамі, агучанымі пад стэнаграму, прагаласавалі 230 народных дэпутатаў.

Згодна з прынятым папраўкамі, Кодэкс уваходзіць у дзеянне з 1 снежня 2023 года.

Дакумент прадугледжвае правядзенне парламенцкіх выбараў паводле адкрытых спісаў.

Усяго народныя дэпутаты разгледзелі 4568 правак да дакумента.

"Для Украіны як дэмакратычнай дзяржавы вялікае значэнне мае прывядзенне ўкраінскага выбарчага заканадаўства і практыкі правядзення выбараў у адпаведнасці з еўрапейскімі выбарчымі стандартамі", - сказана ў тлумачальнай запісцы.

Вярхоўная Рада прыняла законапраект у першым чытанні 7 лістапада 2017 года. Дакумент паступіў у Раду ў 2015 годзе, яго ініцыятарам выступіў спікер ВР Андрэй Парубій.

6 чэрвеня 2019 года парламент прыступіў да разгляду праекта Выбарчага кодэкса Украіны ў другім чытанні.

Згодна з дакументам, парламенцкія выбары прапаноўваецца праводзіць паводле сістэмы рэгіянальных адкрытых спісаў, а бар'ер усталяваць на ўзроўні 4%. На выбарах у сельскія, пасялковыя, раённыя, раённыя ў гарадах і гарадскія рады маленькіх гарадоў (да 90 тысяч выбарцаў) прапануецца шматмандатная мажарытарная сістэма: у акрузе перамагае не адзін кандыдат, як сёння, а ад двух да чатырох кандыдатаў у залежнасці ад колькасці выбарцаў . На выбарах у абласныя рады і гарсаветы вялікіх гарадоў (ад 90 тысяч выбарцаў) таксама прапануецца сістэма адкрытых спісаў.

Пазачарговыя выбары Вярхоўнай Рады 21 ліпеня павінны прайсці згодна з дзейным выбарчым заканадаўствам, што прадугледжвае змешаную сістэму (225 дэпутатаў абіраюцца паводле прапарцыйнай сістэмы і 225 паводле мажарытарнай), закрытыя партыйныя спісы і 5-адсоткавы прахадны бар'ер.