16 лiпеня 2019, aўторак, 14:18
Мы ў адной лодцы
Рубрыкі

Сямашка: Роўмінг паміж Беларуссю і Расеяй можа быць скасаваны да 15 верасня

17
УЛАДЗІМІР СЯМАШКА
ФОТА: DELFI

Профільныя міністэрствы «прыйшлі да кансэнсусу».

Дакумент для скасавання роўмінгу паміж Беларуссю і Расеяй можа быць падпісаны да 15 верасня. Пра гэта заявіў у чацвер ТАСС амбасадар Беларусі ў РФ Уладзімір Сямашка, які прыбыў з працоўным візітам у Наўгародскую вобласць.

"Гэтая тэма [скасаванне роўмінгу] ўжо даўно абмяркоўваецца, – сказаў ён. – Ёсць, калі мне не здраджвае памяць, прамое даручэнне прэзідэнтаў у роўмінгу да 15 верасня гэтага года падпісаць адпаведны дакумент – пра скасаванне роўмінгу ў агульным плане".

"Там ёсць нейкія нюансы, але фактычна і ваша міністэрства, і наша міністэрства інфармацыі і сувязі ўжо прыйшлі да нейкага кансэнсусу, – дадаў Сямашка. – Калі Лукашэнка і Пуцін даручаюць, то трэба выконваць. Я ведаю, тэрмін такі ёсць".

У канцы чэрвеня 2017 года пытанне пра скасаванне роўмінгу паміж краінамі абмяркоўвалася на паседжанні "вышэйшай дзяржрады саюзнай дзяржавы". Старшыня Рады Федэрацыі Валянціна Мацвіенка прапанавала на аналогію з ЕЗ скасаваць роўмінг на тэрыторыі СД і папрасіла запісаць пратакольнае даручэнне пра прапрацоўку гэтага пытання міністрам сувязі дзвюх дзяржаваў.

Кіраўнік Мінкамсувязі РФ Канстанцін Наскоў заяўляў, што бакі пакуль не прыйшлі да кансэнсусу ў пытанні скасавання роўмінгу. Расея прапануе скасаваць плату за ўваходныя званкі пры знаходжанні абанентаў у іншай краіне, а Менск настойвае на зніжэнні кошту званкоў. У РФ таксама адзначалі, што расейскія мабільныя аператары могуць скасаваць абаненцкую плату за ўваходныя выклікі для карыстальнікаў, якія знаходзяцца на тэрыторыі Беларусі, да сярэдзіны 2019 года ў выпадку вызначэння сіметрычных ставак на паслугі для пропуску трафіку, гэта значыць пры выраўноўванні так званага інтэрканэкту.