У Венесуэле затрыманыя целаахоўнікі Хуана Гуайдо
1- 14.07.2019, 10:54
- 7,924
Прэзідэнт Венесуэлы абвінаваціў рэжым Мадуры ў выкраданні двух чалавек са сваёй каманды.
Падкантрольныя рэжыму ўзурпатара Мадуры "сілы бяспекі" Венесуэлы затрымалі двух целаахоўнікаў прэзідэнта краіны Хуана Гуайдо. Сам Гуайдо ў суботу, 13 лiпеня абвінаваціў "баязлівы рэжым" Нікаласа Мадуры ў выкраданні чальцоў сваёй каманды, паведамляе dw.com.
Régimen cobarde secuestra a miembros de mi equipo Erick Sánchez y Jason Parisi que estaban en Caracas resguardando a mi familia mientras me encuentro en Trujillo. La naturaleza del régimen, su temor, divisiones y contradicciones son el mayor obstáculo para una solución pacífica.
— Juan Guaidó (@jguaido) July 13, 2019
Паводле версіі афіцыйнага Каракаса, затрыманыя датычныя да нелегальнага гандлю зброяй. Так, міністр сувязі і інфармацыі Венесуэлы Хорхе Радрыгес заявіў, што целаахоўнікі Гуайдо мелі намер прадаць стралковую зброю, выкрадзеную пры спробе зрынуць урад Мадуры падчас так званай аперацыі "Свабода" ў канцы красавіка.
Хуан Гуайдо супраць Нікаласа Мадуры
Венесуэла знаходзіцца ў глыбокім палітычным і сацыяльным крызісе ўжо некалькі месяцаў. Пасля ўступлення Нікаласа Мадуры на пасаду кіраўніка дзяржавы на другі тэрмін у студзені 2019 года ў краіне аднавіліся актыўныя палітычныя пратэсты. Старшыня парламента паўднёваамерыканскай краіны Хуан Гуайдо абвесціў сябе выканаўцам абавязкаў прэзідэнта.
Легітымнасць ягонага лідарства прызналі больш як 50 дзяржаваў свету, у тым ліку ЗША і краіны ЕЗ. У сваю чаргу Мадура карыстаецца падтрымкай войска і сілавых структураў, яму таксама дапамагаюць Куба і Расея.
ААН абвінавачвае ўлады Венесуэлы ў тысячах пазасудовых расправаў
У пачатку ліпеня офіс вярхоўнага камісара ААН у правах чалавека Мішэля Бачэлета апублікаваў даклад пра сітуацыю ў Венесуэле. Паводле звестак аўтараў, са студзеня 2018 года амаль 7 тысячаў чалавек загінулі ў выніку пазасудовых расправаў, учыненых сіламі бяспекі падчас спецаперацый. Улады паўднёваамерыканскай краіны выкарыстоўваюць стратэгію, "накіраваную на нейтралізацыю, уціск і крыміналізацыю палітычных апанентаў і крытыкаў ураду", падкрэслілі складальнікі дакумента.
