Выбары ва Украіне: Партыя Смяшко «Сіла і гонар» праходзіць у Раду

У рэйтынгаx адбыліся змены.

Паводле звестак апытання Кіеўскага міжнароднага інстытута сацыялогіі, калі б выбары ў Вярхоўную Раду праходзілі ў сярэдзіне ліпеня, то ў парламент новага склікання прайшлі б пяць партый, паведамляе nv.ua.

Звесткі КМІС сведчаць, што партыю «Слуга народа» падтрымліваюць 52,3% сярод тых, хто вызначыўся з выбарам і збіраецца галасаваць. Далей ідзе «Апазіцыйная платформа за жыццё» з падтрымкай 10,3% рэспандэнтаў. За «Еўрапейскую салідарнасць» гатовыя аддаць свае галасы 7,9% апытаных, за ВА «Бацькаўшчына» – 5,8%.

Акрамя таго, паводле звестак апытання, 5% бар'ер пераадольвае партыя «Сіла і Гонар» Ігара Смяшко, якую падтрымліваюць 5,1% апытаных.

У той самы час за партыю «Голас» гатовыя прагаласаваць 4% рэспандэнтаў.

У «Апазіцыйнага блока» 3,0% падтрымкі, у «Грамадзянскай пазіцыі» – 2,5%, у «Радыкальнай партыі» – 2,4%. ВА «Свабода» і партыю Шарыя падтрымалі кожную 1,5% рэспандэнтаў, «Украінскую стратэгію» Гройсмана – 1,3%.

Астатнія партыі сумарна набіраюць 2,4% галасоў.

Апытанне праводзілася з 3 да 13 ліпеня метадам асабістага інтэрв'ю. Усяго было апытана 2004 рэспандэнты з 125 населеных пунктаў.

Нагадаем, паводле звестак апытання сацыялагічнай службы Цэнтра Разумкова, за партыю «Слуга народа» гатовыя аддаць голас 41,5% сярод тых, хто мае намер удзельнічаць у выбарах і ўжо вызначыўся з выбарам. За партыю «Апазіцыйная платформа – за жыццё» маюць намер прагаласаваць 12,5%, за партыю «Голас» – 8,8%, за партыю «Еўрапейская салідарнасць» – 8,3%, за ВА «Бацькаўшчына» – 7%.