25 жнiўня 2019, Нядзеля, 15:39
Мы ў адной лодцы
Рубрыкі

Беларусы расказалі, якія лекі набываюць за мяжой

27
Беларусы расказалі, якія лекі набываюць за мяжой

Некалькі прэпаратаў, кошты якіх у нас і за мяжой істотна адрозніваюцца.

Міністэрства аховы здароўя аналізуе кошты лекаў, у тым ліку набытыя за мяжой. Тым, хто купляе прэпараты ў іншых краінах, прапанавалі даслаць у каментары да замацаванага запісу на старонцы Міністэрства аховы здароўя ў Facebook фота ўпакоўкі або чэка на лекі, кошт якіх ніжэйшы, чым у Беларусі. Пад паведамленнем ужо больш за 240 каментароў.

Журналісты tut.by выбралі некалькі прэпаратаў, кошты якіх у нас і за мяжой адрозніваюцца.

Напрыклад, карыстальнікі Facebook пішуць на старонцы Міністэрства аховы здароўя аб тым, што купляюць у Літве прэпарат «Небілет». У Беларусі на сайце tabletka.by ўпакоўку з 28 таблетак «Небілет Плюс» прапаноўваюць за суму ад 12 да 24,56 рублёў. Пры гэтым з 12 рублёў засталася ўсяго адна ўпакоўка ў аптэцы горада Лельчыцаў. У Літве ўпакоўка з 90 таблетак каштуе 12,46 еўра (28 рублёў 55 капеек).

Карыстальнікі сацсетак паказваюць швэйцарскія таблеткі «Гептрал». У нас упакоўка з 20 таблетак каштуе ад 63 да 88,28 рубля. У Расеі - 1635 расейскіх рублёў, а гэта 52 рублі 88 капеек.

Сярод прэпаратаў паказаны «Остэагенон» французскага вытворцы «П'ер Фабр». На сайце tabletka.by напісана, што за ўпакоўку з 40 таблетак у аптэках прапануецца заплаціць больш за 35 рублёў. У Расеі, калі верыць інтэрнэт-аптэцы piluli.ru, такая ж упакоўка каштуе 721 рубель, а гэта крыху больш за 23 беларускія рублі. У Варшаве гэты ж прэпарат, калі праверыць па парталу gdziepolek.pl, каштавацьме ад 29,90 да 45 злотых. У пераліку на беларускія рублі - ад 16 рублёў 6 капеек да 24 рублёў 17 капеек.

Сярод прэпаратаў, якія за мяжой таннейшыя, чым у нас, належыць французскі «Плавікс». У нас упакоўка з 14 таблетак па 75 мг кожная пілюля каштавацьме 19,90 да 32,90 рублёў. У Расеі вялікая ўпакоўка з 28 таблетак, - 916 расейскіх рублёў (29 беларускіх рублёў 62 капейкі). У Варшаве ўпакоўка з 28 таблетак каштавацьме ад 20,50 да 90,99 злотых (ад 11 да 48,86 рублёў). Адзін з карыстальнікаў Facebook піша, што ў Літве ўпакоўка з 84 таблетак каштуе ў пераліку на нашы грошы блізу 34 рублёў.

Сярод прэпаратаў паказаны «Глюкафаж». Упакоўка з 30 таблетак па 850 мг каштуе ў нас ад 6,62 да 9,83 рублёў. У Расеі такая ж упакоўка - 132 рублі, а гэта ў беларускіх грашах 4 рублі 27 капеек.

Карыстальнікі пішуць пра ўнутрыматачную тэрапеўтычную сістэму «Мірэна». У Беларусі яна каштуе ад 389 рублёў да 457. Ва Украіне жанчына набыла такую за 2074,4 грыўні, а гэта ў пераліку 163,62 беларускага рубля.

100 таблетак па 400 мг прэпарата «Трэнтал» у Вільні каштуюць 15,09 еўра, гэта 34,57 рубля. У нас упакоўка 20 таблетак каштуе ад 8,50 да 17,34 рубля.

Таксама адзін з каментатараў паказаў прэпарат «Дэтралекс» (Серв’е, Францыя). У нас упакоўка з 60 таблетак каштуе ад 40 рублёў 10 капеек да 57 рублёў у залежнасці ад аптэкі, а ў Вільні 30 таблетак, што ўдвая менш, чым упакоўка, якую прадаюць у нас, - 7,99 еўра (18,31 беларускага рубля).