Экспэрт: Бездань паміж даходамі менчукоў і жыхароў рэгіёнаў расце
1- 16.07.2019, 15:38
- 10,461
Беларускія рэгіёны могуць страціць свой дэмаграфічны і эканамічны патэнцыял.
У Сеціве апублікаваныя тэзісы дырэктара Даследчага цэнтра ІПМ Аляксандра Чубрыка пад загалоўкам «Акно магчымасцяў або апошні шанец?», паведамляе officelife.media.
Экспэрт адзначае, што за апошнія некалькі гадоў адрозненні паміж сталіцай і рэгіёнамі значна ўзраслі.
Дывергенцыя паміж рэгіёнамі пачалася напярэдадні рэцэсіі 2015-2016 гадоў і не спынілася, а нават паскорылася з пачаткам аднаўлення эканомікі.
У 2014 годзе, як адзначае Чубрык, сярэдні заробак у абласцях складаў 69-77% заробку ў Менску. У 2018-м разрыў стаў расці - 60-72%.
Чубрык таксама прыводзіць суадносіны сярэдняга заробку ў рэгіёнах у параўнанні з некаторымі суседнімі краінамі, але не бярэ ў разлік Украіну.
Краіна, з якой параўноўваецца заробак | 2014 | 2018 |
|---|---|---|
Расея | 61–69% | 57–68% |
Літва | 57–65% | 36–43% |
Польшча | 43–48% | 31–37% |
Верхняя мяжа гэтых інтэрвалаў - гэта Менская вобласць, а ў астатніх рэгіёнах сярэдні заробак быў прыкметна ніжэйшым.
Экспэрт падкрэслівае, што пакуль цяжка зрабіць дакладны аналіз наступстваў росту заробкавай прорвы паміж Менскам і рэгіёнамі. Аднак ён мяркуе, што, мяркуючы з усяго, міграцыйныя працэсы паскорыліся і рэгіёны пачалі хутчэй губляць найбольш актыўную і кваліфікаваную працоўную сілу.
Відавочна, такія тэндэнцыі пагражаюць устойлівасці эканамічнага развіцця краіны і патрабуюць захадаў, якія дазволілі б рэгіёнам краіны не згубіць свой патэнцыял.
