Чым займаецца Еўракамісія і хто ў ёй працуе

Еўракамісія разам з Еўрапарламентам і Радай ЕЗ - адна з асноўных структур Еўразвязу.

Пасля выбараў у Еўрапарламент, якія прайшлі ў траўні 2019 года, паўстала пытанне аб тым, хто зойме ключавыя пасады ў ЕЗ, піша «Нямецкая хваля». Цяпер усё яшчэ ідзе барацьба за пасаду старшыні Еўракамісіі. Узначаліць гэтую структуру можа немка Урсула фон дэр Ляен (Ursula von der Leyen).

У пачатку ліпеня краіны ЕЗ афіцыйна вылучылі яе на гэтую пасаду. За кандыдатуру фон дэр Ляен прагаласавалі 27 удзельнікаў саміту ЕЗ - усе, акрамя Ангелы Мэркель (Angela Merkel). Канцлерка Нямеччыны ўстрымалася, бо фон дэр Ляен не падтрымалі нямецкія сацыял-дэмакраты - партнёры блока партый ХДС/ХСС у кіроўнай кааліцыі.

Перад тым, як фон дэр Ляен афіцыйна абвясціла аб сваім жаданні балатавацца на пасаду старшыні Еўракамісіі, яна падала ў адстаўку з пасады міністра абароны Нямеччыны. Цяпер для абрання на пасаду старшыні Еўракамісіі Урсуле фон дэр Ляен патрэбна атрымаць большасць галасоў у Еўрапарламенце. Якой жа структурай давядзецца кіраваць таму, хто зойме месца кіраўніка Еўракамісіі?

За што адказвае Еўракамісія

Еўракамісія з'яўляецца вышэйшым органам выканаўчай улады Еўразвязу. Яе можна параўнаць з урадам кожнай з краін-чальцоў ЕЗ. Адна з асноўных задач Еўракамісіі - сачыць за выкананнем велізарнай колькасці законаў і правілаў, якія тычацца ўсіх сфер паўсядзённага жыцця еўрапейскіх грамадзян: няхай гэта будзе якасць прадуктаў харчавання, працэдура рэгістрацыі лекаў або абмежаванне выкідаў выхлапных газаў.

У выпадку, калі якая-небудзь з краін парушае заканадаўства ЕЗ, Еўракамісія можа пачаць супраць яе штрафную працэдуру. Пры прыняцці такіх пастаноў у Брусэлі кіруюцца, у тым ліку, і палітычнымі матывамі: Еўракамісіі часцяком даводзіцца шукаць залатую сярэдзіну паміж неабходнасцю забяспечваць выкананне законаў і мэтазгоднасцю штрафных захадаў.

Акрамя гэтага, Еўракамісія распрацоўвае законапраекты, якія затым павінны быць зацверджаныя Радай ЕЗ і Еўрапарламентам у рамках шматэтапнага працэсу. Часам гэта прыводзіць да гарачых спрэчак, як у выпадку з дырэктывай, згодна з якой сярэдняя працягласць працоўнага часу ў краінах ЕЗ не павінна перавышаць 48 гадзін на тыдзень. Супраць абмежаванняў выступалі некалькі краін-чальцоў Еўразвязу.

Чым займаецца Еўракамісія

Пры гэтым варта адзначыць, што ў большасці выпадкаў Еўракамісія мае права самастойна расстаўляць свае прыярытэты - да прыкладу, надаваць асноўную ўвагу скарачэнню разрыву паміж багатымі і беднымі рэгіёнамі ЕЗ, пачаць барацьбу з беспрацоўем сярод моладзі або запусціць буйную праграму інвестыцый у эканоміку Еўразвязу, як гэта зрабіў адыходзячы са сваёй пасады кіраўнік Еўракамісіі Жан-Клод Юнкер.

Акрамя таго, Еўракамісія бярэ актыўны ўдзел у развязанні ключавых палітычных пытанняў - да прыкладу, у тым, што тычыцца выратавання ўцекачоў або захавання правоў чалавека. Зрэшты, для аднаўлення выратавальнай аперацыі ў Міжземным моры ёй спатрэбіцца згода краін-чальцоў ЕЗ. Менавіта яны павінны будуць падаць караблі і персанал, бо ў Еўракамісіі няма ўласных суднаў або службаў выратавання.

Колькі супрацоўнікаў у Еўракамісіі

Еўракамісія складаецца з дзвюх частак. Першая - 28 камісараў ЕЗ, якія прадстаўляюць усе краіны Еўразвязу. Кожны з іх адказвае за пэўную сферу дзейнасці Еўразвязу. Партфелі паміж імі размяркоўвае старшыня Еўракамісіі - да прыкладу, прызначае камісараў ЕЗ у пытаннях канкурэнцыі, транспарту і развіцця.

Другая частка Еўракамісіі - яе шараговыя супрацоўнікі - высокакваліфікаваныя экспэрты з усіх краін-чальцоў ЕЗ, абраныя з дапамогай адкрытых конкурсаў. Тут працуюць спецыялісты самых розных профіляў, пачынаючы ад юрыстаў у галіне гандлёвага права і заканчваючы спецыялістамі ў харчовай бяспецы. На сёння сталы штат Еўракамісіі складае 25 000 чалавек.

На чале гэтай структуры знаходзіцца яе старшыня. Ён прадстаўляе Еўракамісію на міжнародным узроўні. Так, Жан-Клод Юнкер паспрабаваў развязаць гандлёвую спрэчку з ЗША падчас сустрэчы з Дональдам Трампам, а таксама ўзяў удзел у саміце G20 у Осака ў канцы чэрвеня.

Акрамя таго, старшыня Еўракамісіі курыруе дачыненні з краінамі, якія падпісалі пагадненні аб асацыяцыі з ЕЗ, і кандыдатамі на ўступленне ў ЕЗ. Да прыкладу, у пачатку чэрвеня Юнкер правёў перамовы з прэзідэнтам Украіны Уладзімірам Зяленскім. У прысутнасці Юнкера таксама былі падпісаныя пяць пагадненняў аб супрацоўніцтве з Кіевам: на падтрымку розных праектаў ва Украіне, уключаючы захады рэалізацыі ключавых рэформаў, Брусэль выдасць амаль 130 млн еўраў.

Хто фармуе бюджэт ЕЗ

Гэтыя сродкі паступяць ва Украіну з бюджэту ЕЗ, аб'ём якога ў 2018 годзе складаў 145 млрд еўраў. Самым значным артыкулам выдаткаў у Еўразвязе па-ранейшаму застаецца субсідаванне сельскай гаспадаркі. На другім месцы - падтрымка эканамічна адсталых рэгіёнаў ЕЗ.

Пытанне аб суме бюджэту і размеркаванні сродкаў у ЕЗ традыцыйна выклікае ў Брусэлі гарачыя спрэчкі. Краіны-донары - у асноўным, заходнееўрапейскія і скандынаўскія сябры Еўразвязу - патрабуюць знізіць суму ўнёскаў. Супраць гэтага выступаюць галоўныя атрымальнікі сродкаў, напрыклад, Польшча. Аднак у выніку бакі звычайна ўсё ж здольныя знайсці кампраміс. Пры гэтым скаргі некаторых краін аб празмерных унёсках часцяком нельга назваць абгрунтаванымі: на сёння бюджэт ЕЗ складае толькі блізу 1 адсотка ад сукупнага ВУП Еўразвязу.