Турцыю канчаткова адхілілі ад вытворчасці знішчальнікаў F-35

Расейскія комплексы С-400 прызнаныя шпіёнскай тэxнікай.

Вашынгтон канчаткова забараніў Анкары ўдзельнічаць у праграме стварэння знішчальнікаў F-35. Прычына адмовы - пастанова ўладаў Турцыі закупіць расейскія зенітныя ракетныя комплексы С-400, гаворыцца ў заяве Белага дома.

Як падкрэсліваецца ў дакуменце, амерыканскія знішчальнікі-бамбавікі F-35 не могуць выкарыстоўвацца побач з расейскай шпіёнскай тэхнікай, прызначанай для таго, каб выведаць інфармацыю пра баявы якасці гэтых самалётаў. Набыццё С-400 падрывае абавязанні краін-сябраў NATO не выкарыстоўваць расейскія сістэмы ўзбраенняў.

Тое, што адбылося можа аказаць негатыўнае ўздзеянне на ўзаемадзеянні Турцыі з NATO. Тым не менш, Вашынгтон працягне комплекснае ўзаемадзеянне з Анкарой, адзначаецца ў заяве.

Паводле звестак Пентагона, выхад Турцыі з праграмы вытворчасці F-35 абыдзецца Анкары недаатрыманнем інвестыцый на суму блізу дзевяці мільярдаў даляраў (прыкладна 8,2 млрд еўраў). Перанос вытворчасці з Турцыі абыдзецца ЗША прыкладна ў 500-600 мільёнаў даляраў (прыкладна 445-535 млн еўраў) - такія звесткі прывяла намеснік міністра абароны ЗША Элен Лорд на брыфінгу ў Пентагоне.

Раней, 16 ліпеня, паведамлялася, што ЗША не стануць прадаваць Турцыі знішчальнікі F-35 - меркавалася, што Турцыя набудзе ў ЗША каля ста такіх самалётаў. У той жа час прэзідэнт ЗША Дональд Трамп усклаў віну за куплю Турцыяй расейскіх ЗРК С-400 на адміністрацыю ЗША Барака Абамы. Анкара была «вымушаная» закупіць С-400, бо адміністрацыя папярэдняга прэзідэнта ЗША адмовілася прадаваць Турцыі амерыканскія супрацьракетныя комплексы Patriot, заявіў Трамп.