Зяленскі падаў грамадзянства Украіны двум беларускім добраахвотнікам

Дзяніс Прохараў і Сяргей Аляксеевіч атрымалі ўкраінскія пашпарты.

Украінскі прэзідэнт Уладзімір Зяленскі ўвёў у грамадзянства Украіны дзевяць замежнікаў. Адпаведны ўказ ад 18 лiпеня апублікаваны на сайце кіраўніка дзяржавы.

Зяленскі ўвёў ва ўкраінскае грамадзянства сем асобаў, якія прадстаўляюць дзяржаўны інтарэс для Украіны: Сяргея Аляксеевіча, Дзяніса Прохарава, Мікіту Макеева, Андрэя Каўнірэнку, Сяргея Гнаевога, Нугзара Кандэлакі і Станіслава Гібадуліна, піша "Гордон".

Акрамя таго, Зяленскі ўвёў у грамадзянства двух замежнікаў за выдатныя заслугі перад Украінай: Аляксея Сівохіна і Дзмітрыя Фаміна.

«Українські новини» адзначаюць, што Аляксеевіч і Прохараў з'яўляюцца выхадцамі Беларусі, Кандэлакі - Грузіі, Гібадулін - Малдовы. Астатнія замежнікі, якія, згодна з указам кіраўніка дзяржавы, атрымаюць украінскі пашпарт, з'яўляюцца выхадцамі Расеі.