Польшча і Беларусь упершыню з часоў СССР удакладнілі дзяржаўную мяжу

Работы доўжыліся восем гадоў.

Памежнікі Польшчы і Беларусі закончылі праверку стану дзяржаўнай мяжы на ўсёй яе працягласці паміж дзвюма дзяржавамі. Гэта першая такая праверка з часоў абвяшчэння незалежнасці Беларусі ў 1991 годзе і выхаду яе са складу СССР, паведамляе «Радыё Польшча».

Работы доўжыліся восем гадоў. За гэты час была правераная нумарацыя і размяшчэнне ўсіх памежных знакаў, было праверана, ці не змянілася раздзяляльная лінія паміж двума краінамі. Бывае, што гэта здараецца, напрыклад, у выніку зрушэння рэчышча ракі, па якім праходзіць мяжа.

З адмысловага пратаколу, падпісанага абодвума бакамі ў Гародні, відаць, што на мяжы не адбылося ніякіх зменаў.

Працягласць польска-беларускай мяжы складае амаль 428 кіламетраў, з якіх блізу 242 кіламетраў па вадзе.