Сяргей Гурэнка: У мінулым годзе мы б без сумневаў прайшлі «Ліепаю»

Настаўнік менскага «Дынама» пракаментаваў гульню з латвійскім клубам.

Галоўны трэнер менскага «Дынама» Сяргей Гурэнка сказаў на прэс-канферэнцыі пасля паразы (1:2) у матчы ў адказ першага кваліфікацыйнага раўнду Лігі Еўропы ад «Ліепаі», што ў мінулым розыгрышы ягоная каманда змагла б падолець латвійскі клуб, паведамляе pressball.by.

- Фатаі сёння ў старце. У вас вялікая вера ў гульца або занадта "кароткая" лаўка? Ці будзе аштрафаваны футбаліст? Бо нерэалізаваны пенальці ў першым матчы шмат у чым вызначаў вынік супрацьстаяння.

- Не згодны. Фатаі шмат чапляўся за мячы, ён - найлепшы нападнік у камандзе цяпер. Фатаі прапаноўваў сябе, чапляўся за мячы, але ў яго была слабая падтрымка з глыбіні. З гэтым я згодны. Зубовіч выпаў, Біланог больш індывідуальны гулец, калі ёсць прастора. Зразумейце, на макеце можна паказаць усё, што хочаш, але ўсведамленне прыходзіць праз штодзённую працу. Выпрацоўваецца аўтаматызм... Але гэта трэба пабыць у шкуры спартоўца.

- Што вы сказалі гульцам пасля матчу?

- Сказаў, што павінны зрабіць высновы. У футболе не бывае перамог без параз. Не трэба гараваць, трэба больш працаваць, праз гэта можа прыйсці вынік. У мінулым годзе мы б прайшлі «Ліепаю», без сумненняў. Год на год не прыходзіцца.

- Пасля паразы вы досыць спакойныя, хоць вы эмацыйны чалавек. Гэта трэнерскі досвед?

- Эмоцыямі не дапаможаш. Трэба папрацаваць. Цяпер паўза, і ёсць магчымасць падрыхтавацца да другой часткі чэмпіянату. Трэба прааналізаваць, але я ўсё разумею. Прыйдуць пачаткоўцы... Яшчэ шмат матчаў. І кубак Беларусі, і чэмпіянат.

- Ці задаволеныя вы гульнёй Трабоціча?

- Трабоціч нядрэнна дзейнічаў. Капленка быў выматаны. Маленькія людзі больш жывучыя. Капленку было цяжка. І пераезды, і Бераце... Дзінку апусціў ніжэй, каб вёў гульню, плюс выпусціў тройку ў атаку. Аднак у нас не атрымалася, сёй-той выпаў... Гульцы атакі ўсе залежныя. Трэба быць гатовым да стартавым рыўкоў. Зрэшты, трэба быць гатовым, каб гэта зрабіць.

- Што сказалі камандзе ў перапынку? Каманда завялася, але потым апусціла рукі.

Мы рукі не апусцілі. Калі вы бачылі, хлопцы хацелі забіць гол, былі моманты. У выніку атрымалася забіць... Не скажу, што хлопцы апусцілі рукі, яны да канца біліся. Гульцы, якія выйшлі на замену, таксама.

- Пасля першага прапушчанага мяча вы нешта сказалі, звяртаючыся да лаўкі...

- Хлопцам тлумачыў, што Швецаў празяваў свайго гульца. Калі б ён згуляў тактычна правільна, заблакаваў, то не было б мяча. Было адкрыванне за спіну, а Швецаў глядзеў за гульнёй. Калі пайшла перадача, ён стаў рухацца, але ўжо саступіў на старце апаненту.