Зяленскі звольніў 11 амбасадараў Украіны ў 20 краінах
13- 19.07.2019, 18:08
- 14,122
Найважнейшым кадравым змяненнем стала звальненне Валерыя Чалага, які займаў пасаду амбасадара Украіны ў ЗША.
Прэзідэнт Украіны Уладзімір Зяленскі падпісаў указы аб звальненні групы дыпламатаў. Свае пасады адначасова страцілі адразу 11 амбасадараў, якія прадстаўлялі Украіну ў дваццаці розных краінах.
Найважнейшым кадравым змяненнем стала звальненне Валерыя Чалага, які займаў пасаду надзвычайнага і паўнамоцнага амбасадара Украіны ў ЗША, а таксама ў Трынідадзе і Табага і Антыгуа і Барбуда.
Чалы займаў пасаду амбасадара Украіны ў ЗША з 10 ліпеня 2015 года, дагэтуль ён быў намеснікам кіраўніка адміністрацыі прэзідэнта Пятра Парашэнкі.
Іншымі ўказамі былі адпраўленыя ў адстаўку амбасадары Украіны ў:
Іарданіі - Сяргей Пасько;
Аргентыне, Парагваі, Уругваі і Чылі - Юры Дзюдзін;
Ватыкане і пры ордэне гаспітальераў - Таццяна Іжэўская;
Туркменістане - Валянцін Шэвалеў;
В'етнаме і Камбоджы - Аляксей Шаўкапляс;
Арменіі - Пётр Літвін;
Нігерыі, Гане, Беніне і Сьера-Леонэ - Валерый Александрук;
ПАР - Тарас Кузьміч;
Марока - Яраслаў Коваль;
і на Кіпры - Барыс Гумянюк.
Раней намеснік кіраўніка адміністрацыі Зяленскага Вадзім Прыстайко казаў, што кіраўнік дзяржавы плануе замяніць 12 амбасадараў у сувязі з тым, што «большасць з іх знаходзяцца на пасадзе значна большы тэрмін, чым традыцыйныя тэрміны для ўкраінскай дыпламатыі». У паведамленні адміністрацыі ўкраінскага лідара ў Telegram-канале 15 ліпеня паведамлялася, што «амбасадар Украіны ў ЗША скончыць сваю працоўную выправу ў Вашынгтоне».