20 ліпеня 1969 года месячны модуль амерыканскага касмічнага карабля «Апалон 11» апусціўся ў Мора Спакою на Месяцы. Чалавек упершыню ступіў на паверхню іншага нябеснага цела.
У модулі знаходзіліся камандзір экіпажа Ніл Армстронг - менавіта ён высадзіўся на паверхню спадарожніка Зямлі першым - і пілот Эдвін («Базз») Олдрын. Яшчэ адзін астранаўт Майкл Колінз застаўся на калямесячнай арбіце ў камандна-службовым модулі «Апалона 11».
«Мы прыйшлі з мірам ад імя ўсяго чалавецтва», - было выгравіравана на памятнай шыльдзе разам з подпісамі трох астранаўтаў, пакінутай на Месяцы.
Паспяховая місія стала кульмінацыяй праграмы пілатуемых палётаў амерыканскага касмічнага агенцтва (NASA) і адзначыла перамогу ЗША над СССР у месячнай гонцы.