Кіраўнік «Слугі народа» сказаў, што для кааліцыі ва ўкраінскім парламенце ім ніхто не патрэбны

Таксама Дзмітрый Разумкоў адказаў на пытанне аб магчымым прэм'еры Украіны. 

Кіраўнік украінскай партыі "Слуга народа" Дзмітрый Разумкоў заявіў, што фармаванне кааліцыі ў Вярхоўнай Радзе будзе залежаць ад таго, якія будуць канчатковыя вынікі падліку галасоў, але, магчыма, палітычнай сіле і не давядзецца аб'ядноўвацца з іншымі партыямі, піша "Украінская праўда".

Пра гэта ён сказаў на брыфінгу ў панядзелак.

Паводле ягоных слоў, "Слуга народа" адкрытая да дыялогу, але трэба зыходзіць з канчатковых вынікаў апанентаў.

"Супрацоўнічаць у Радзе мы зможам з усімі палітычнымі сіламі, якія будуць супадаць з намі ў ідэалагічных поглядах, у базавым бачанні развіцця нашай краіны", - сказаў Разумкоў.

"Але пакуль казаць аб кааліцыі, мабыць, не выпадае, бо мы бачым дастаткова нядрэнныя нашы вынікі. І мы яшчэ не да канца бачым вынікі нашых калегаў або апанентаў з Вярхоўнай Рады", - дадаў ён.

На пытанне, ці пагадзілася б партыя падтрымаць на пасаду прэм'ер-міністра Святаслава Вакарчука, Разумкоў адзначыў, што кіраўніка ўрада прапануе кааліцыя, пра склад якой гаварыць пакуль не даводзіцца.

"Давайце паглядзім вынікі "Голаса" і вынікі "Слугі народа". Думаю, у нашай камандзе дастаткова людзей, якія могуць адпавядаць тым выклікам, якія ёсць у краіне. У нас ёсць па 2-3 чалавекі на кожную пасаду", - падкрэсліў палітык.

Пры гэтым прозвішчы кандыдатаў, ён не стаў называць.

Акрамя таго Разумкоў сцвярджае, што ўкраінцам не варта баяцца ўзурпацыі ўлады.