Каля БелАЭС адбылося надзвычайнае здарэнне
25- 23.07.2019, 8:09
- 36,369
НЗ здарылася таму, што праваліўся асфальт.
Каля БелАЭС у Астраўцы адбылося надзвычайнае здарэнне: перавярнулася пажарная машына. Гэта здарылася, бо праваліўся асфальт. Фотаздымак аварыі апублікаваў тэлеграм-канал Nexta, паведамляе «Радыё Свабода».
Паводле інфармацыі Nexta, аўтамабіль МНС трапіў колам у пралом асфальту і перакуліўся. Інцыдэнт адбыўся 20-ліпеня пад 19:20, калі машына выязджала са сваёй часткі на тэрыторыі БелАЭС на пажар у вёсцы Бярозаўка Астравецкага раёна.
У прэс-службе МНС карэспандэнту «Радыё Свабода» пацвердзілі факт дарожна-транспартнага здарэння «на дарозе агульнага карыстання». Аднак адмовіліся даць падрабязнасці. Дадалі, што «ніхто не пацярпеў».
«Больш інфармацыі аб ДТЗ распавядаць мы не маем права», - сказаў афіцыйны прадстаўнік МНС Віталь Навіцкі.
Афіцыйная прадстаўніца Гарадзенскай абласной УМНС Наталля Жывалеўская дадала, што «аўтамабіль не перакульваўся, было ДТЗ».
У Гарадзенскай абласной управе ДАІ карэспандэнту «Радыё Свабода» таксама пацвердзілі факт ДТЗ без пацярпелых, але дэталяў не далі.
«Гэтая інфармацыя не мае ніякай каштоўнасці», - сказалі ў ДАІ.
У Рэспубліканскім унітарным прадпрыемстве «Беларуская атамная электрастанцыя» інфармацыю атрымаць пакуль не ўдалося.