Генерал Макензі: Злучаныя Штаты Амерыкі збілі два іранскія беспілотнікі

Ліквідаваных у Армузскай пратоцы дронаў магло быць і больш.

Кіраўнік Цэнтральнага камандавання ЗША (CENTCOM) генерал Кэнэт Макензі ў інтэрв'ю тэлеканалу CBS News дапусціў, што на мінулым тыдні амерыканцам удалося збіць не адзін, а два іранскія беспілотнікі «ці нават больш», паведамляе РБК.

«Мы думаем, што іх было два. Магло быць і больш, але ў гэтым мы не ўпэўненыя. Цалкам мы ўпэўненыя, што збілі адзін, але і знішчэнне другога дрона не выключаем», - заявіў Макензі.

CBS тлумачыць словы генерала тым, што пры знішчэнні беспілотніка выкарыстоўвалася не ракета, а электроннае выпраменьванне, якое пазбаўляе ўладальнікаў дрона магчымасці яго кантраляваць. Дакладна вядома, што адзін дрон упаў пасля гэтага ў воды Армузскай пратокі. Што да другога, то ён нібыта мог прапасці з экрана радара, аднак незразумела, упаў ён ці не.

Прычынай знішчэння беспілотніка стаў той факт, што ён наблізіўся да амерыканскага карабля Boxer, здольнага перавозіць на сваім борце блізу 30 самалётаў, а таксама гелікаптэры і іншую вайсковую тэхніку.

Пра збіты беспілотнік у мінулы чацвер распавёў прэзідэнт ЗША Дональд Трамп. Ён паведаміў, што робат ігнараваў папераджальныя сігналы, пагражаў бяспецы карабля ВМС і яго экіпажа.

20 чэрвеня ў Іране паведамілі, што збілі амерыканскі выведвальны беспілотнік. Па сцвярджэнні Тэгерана, ён уварваўся ў паветраную прастору краіны. Злучаныя Штаты ў адказ заявілі, што робат быў збіты ў міжнароднай паветранай прасторы. У адказ на знішчэнне беспілотніка прэзідэнт ЗША Дональд Трамп спачатку загадаў нанесці па Ірану ракетны ўдар, аднак у апошні момант спыніў яго выкананне. Як растлумачыў кіраўнік дзяржавы, забойства 150 чалавек было б непрапарцыйным адказам на збіты робат.