Кітай адмаўляецца ад гонкі ядзерных узбраенняў

Адпаведны запіс ўнесены ў «Белую кнігу».

Кітай адмаўляецца ад гонкі ядзерных узбраенняў і ні пры якіх умовах не будзе ўжываць ядзерную зброю першым. Пра гэта гаворыцца ў «Белай кнізе» (урадавым тлумачэнні пазіцыі і ў асобных пытаннях) «Нацыянальная абарона Кітая ў новую эпоху», апублікаванай у Пекіне прэс-канцылярыяй Дзяржаўнай рады КНР у сераду, 24 ліпеня, паведамляе dw.com.

У дакуменце адзначаецца, што КНР можа выкарыстоўваць ядзерную зброю толькі ў мэтах самаабароны, пры гэтым абавязваецца не ўжываць яе супраць тых краін, якія не валодаюць такім тыпам узбраення, а таксама ў зонах, дзе яна забаронена міжнароднымі дамовамі.

Акрамя гэтага ў «Белай кнізе» гаворыцца пра намер Кітая ўдасканаліць тэхнічнае абсталяванне свайго войска. Пекін паказвае на тое, што ў сучасным свеце ў вайсковых дзеяннях усё часцей прымяняюцца лічбавыя тэхналогіі і інтэлектуальныя інфармацыйныя сістэмы.

КНР абвінавачвае ЗША ў парушэнні стратэгічнай раўнавагі ў Азіі

Пекін таксама паказвае на рост абаронных выдаткаў ЗША і вінаваціць Вашынгтон у падрыве «глабальнай стратэгічнай стабільнасці» і «распальванні суперніцтва паміж буйнымі краінамі». Між іншым, на думку КНР, пастаўка сістэм супрацьракетнай абароны ў Паўднёвую Карэю «сур'ёзна парушае» стратэгічную раўнавагу ў рэгіёне.

Папярэдняя «Белая кніга» КНР была апублікаваная ў 2012 годзе, адзначае інфармагенцтва AFP. Паводле выдаткаў на абарону Кітай займае другое месца ў свеце пасля ЗША, пры гэтым у 2019 годзе Пекін плануе павялічыць іх на 7,5 працэнта.