Жыхары Гародні: 3 ліпеня - не наша свята
19- 3.07.2019, 11:05
- 21,030
Сапраўдны Дзень Незалежнасці - 25 сакавіка.
3 ліпеня ў Беларусі ўлады адзначаюць «Дзень незалежнасці». Свята з'явілася ў краіне пасля «рэферэндуму» 1996 года.
Гарадзенскі гісторык Аляксей Кайрыс распавёў «Радыё Рацыя», што сапраўдным днём незалежнасці трэба лічыць 25 сакавіка.
- Для мяне Дзень незалежнасці - гэта менавіта 25 сакавіка. Тады паўстала наша Беларуская Народная Рэспубліка. 101 год таму. Тады былі закладзены пэўныя ідэі суверэнітэту, нашай дзяржаўнасці. 3 ліпеня - гэта для мяне проста звычайная дата вызвалення Менска ад войск нацысцкай Нямеччыны.
На думку журналіста Руслана Кулевіча, святкаванне Дня Незалежнасці павінна адбывацца ў жніўні, бо менавіта ў жніўні 1944 года была вызваленая ўся Беларусь.
- У нас у Беларусі цікавы факт, што адзначаюць гэтае свята 3 ліпеня. А напраўду палова Беларусі была яшчэ пад нямецкай акупацыяй у той час, 3 ліпеня 1944 года. Гародню вызвалілі: адну частку - 16 ліпеня, другую частку - 24 ліпеня. Берасце таксама дзесьці ў 20-х чыслах вызвалілі. І на мой погляд, гэта не правільна, што «Дзень незалежнасці» адзначаюць 3 ліпеня. Трэба браць дату, калі ўсю тэрыторыю Беларусі вызвалілі, апошні горад, апошнюю вёску.